Finlyandiya NATOga a'zo davlatlar bilan mamlakatga qo'shin kiritish bo'yicha muzokaralar olib bormoqda

Finlyandiya NATOning bir qancha davlatlari bilan mamlakat hududiga qo‘shin kiritish ehtimoli bo‘yicha muzokaralar olib bormoqda. Bu haqda Finlyandiya Mudofaa vazirligi rahbari Antti Xakkanen xabar berdi. U aynan qaysi davlatlar bilan muzokaralar olib borilayotganiga aniqlik kiritmadi, ammo gap Shimoliy Yevropa davlatlari va ittifoqning boshqa aʼzolari haqida ketayotganini aytdi.

Uning taʼkidlashicha, ayni damda NATO davlatlari Finlyandiya xavfsizligini taʼminlash uchun oʻz harbiy tuzilmalarining bir qismini ajratishi mumkinligi muhokama qilinmoqda. Mudofaa vazirligi rahbarining so‘zlariga ko‘ra, harbiylar Finlyandiyada uzoq muddatga joylashtirilishi mumkin, ammo doimiy asosda emas.

“Gap haqiqiy harbiy tahdid bo‘lmagan, ammo vaziyat keskinlashgan, ya’ni vaziyat NATO nizomining beshinchi moddasiga to‘g‘ri keladigan payt haqida bormoqda”, — deya ta'kidladi Antti Xakkanen.

NATO nizomining beshinchi moddasi alyansga a'zo davlatlardan biriga hujum qilingan taqdirda jamoaviy mudofaani nazarda tutadi.

16 avgust kuni Rossiya prezidenti yordamchisi Nikolay Patrushev, uning fikricha, G‘arb davlatlari Rossiyani Boltiq dengiziga chiqish imkoniyatidan mahrum qilib, uni NATOning “ichki dengizi”ga aylantirmoqchi ekanini aytdi. Unga ko‘ra, bu maqsadlarda alyansning yangi a’zolari Shvetsiya va Finlyandiyadan foydalanilmoqda.

Iyun oyi oʻrtalarida Finlyandiya hukumati “Tashqi va xavfsizlik siyosati toʻgʻrisida”gi hisobotni chop etdi. Hujjatda qayd etilishicha, hozirda mamlakatga bevosita harbiy tahdid yo‘q, biroq Finlyandiya bunga tayyor bo‘lishi kerak. Hisobotda NATOga a’zolikning o‘rni va uning Finlyandiya xavfsizlik strategiyasidagi ahamiyati ham ta’kidlangan.