Germaniya yil oxirigacha Ukraina uchun yana 400 mln yevro ajratadi

Germaniya hukumati davlat budjeti bilan bog‘liq og‘ir vaziyatga qaramay, joriy yil oxirigacha Ukrainaga qo‘shimcha 397,3 million yevro miqdorida harbiy yordam ajratishni rejalashtirmoqda. Bu haqda 19 sentabr, payshanba kuni Germaniya moliya vazirligidagi parlament davlat kotibi Florian Tonkarning Bundestag Budjet qo‘mitasiga yo‘llagan maktubiga tayanib, AFP xabar berdi.

Hujjatda Mudofaa vazirligi xabar bergan Kiyevga qo‘shimcha yordam zarurligi, shuningdek, Ukrainadagi murakkab vaziyat qayd etilgan. Mablag‘lar maxsus «mudofaa sanoatidan harbiy texnika sotib olish» uchun ishlatilishi kerak, dedi Tonkar.

Dronlar, HHM va maxsus texnika

Uning so‘zlariga ko‘ra, Rossiya armiyasining muvaffaqiyatlari Rossiya Federatsiyasi artilleriyadagi ustunligi va rus qo‘shinlarining rejali bombalarni qo‘llashi tufayli Ukraina «katta moddiy yo‘qotishlarga» duchor bo‘ldi. Shu sababli, «qo‘llab-quvvatlash sezilarli darajada ko‘paymasa», Ukraina mag‘lubiyatining «jiddiy xavfi» bor, deya qo‘shimcha qildi Germaniya vazirligi vakili va so‘rovni tasdiqlashni so‘radi.

Shu bilan birga, Germaniya Mudofaa vazirligiga ko‘ra, Ukrainaga qo‘shimcha yordam 2024 yilning qolgan oylarida jang maydonidagi vaziyatga ta’sir qilishi uchun «zudlik bilan» berilishi kerak. Gap himoya va maxsus jihozlar, dronlar, shuningdek, havo mudofaasi va Ukraina armiyasining chidamliligi sohasida yordam berish haqida bormoqda.

Bundestag Ukrainani qo‘llab-quvvatlashga sodiqligini tasdiqladi

Hukumat so‘rovini izohlar ekan, Bundestag Budjet qo‘mitasi a’zosi Karsten Klyayn Berlin Kiyevga bergan yordam va’dalarini bajarish niyatida ekanini ta’kidladi. «Ukraina Germaniyaning yordamiga ishonishi mumkin», dedi Klyayn AFP'ga bergan intervyusida.

Avgust oyida Germaniya hukumati budjetdagi qiyinchiliklar tufayli Ukrainaga yordam miqdori kamayishi mumkinligi haqidagi xabarlarni rad etgan edi.

19 sentabr kuni Berlin Kiyevga yetkazib berilayotgan qurollar ro‘yxatini yangiladi. Uning tarkibiga 22 ta Leopard 1A5 tanklari, Gepard o‘ziyurar zenit qurollari, zirhli transport vositalari, minalardan tozalash vositalari, g‘ildirakli transport vositalari kiradi. Bundan tashqari, Germaniya Ukraina qurolli kuchlariga 80 dan ortiq razvedkachi uchuvchisiz uchoqlarni, shuningdek, 61 mingta 155 mm o‘q-dorilarni topshiradi.