Kellog: AQSh Ukrainada Yevropa kuchlarini joylashtirishni muhokama qilmoqda

Qo‘shma Shtatlar Rossiya-Ukraina urushini potensial tartibga solish doirasida Dnipro daryosi g‘arbida Yevropa tinchlikparvar kuchlarini joylashtirish imkoniyatini muhokama qilmoqda. Bu haqda AQSh prezidentining Ukraina bo‘yicha maxsus vakili Kit Kellog 13 may, seshanba kuni Fox News telekanaliga bergan intervyusida ma’lum qildi. Uning so‘zlariga ko‘ra, missiyaga Buyuk Britaniya, Fransiya, Germaniya va Polshadan harbiy xizmatchilar jalb etilishi mumkin.

«Biz chidamlilik kuchi (resilience force). haqida gapiryapmiz. Bu E3 deb ataladigan narsa, lekin inglizlar, fransuzlar va nemislar haqida gap ketganda, bu aslida E4. Va polyaklar. Dnipro daryosining g‘arbiy qismidagi kuch, bu uning aloqa zonasidan chiqib ketganligini anglatadi», dedi Kellog.

Uning ta’kidlashicha, AQSh birinchi navbatda «to‘liq sulh» tarafdori, shundan so‘ng tomonlar boshqa masalalarni — alohida hududlar maqomi, Zaporijjya atom elektr stansiyasi, ukrainalik bolalarning qaytishi va Ukrainaning NATOga a’zo bo‘lish istiqbollarini muhokama qilishlari kerak.

Shu kuni Reuters agentligi uch manbaga tayanib, prezident Donald Tramp Kit Kellog va yana bir maxsus vakil Stiv Uitkoffni Rossiya va Ukraina o‘rtasida 15 may kuni Istanbulda bo‘lib o‘tishi mumkin bo‘lgan muzokaralarga jo‘natmoqchi ekanini xabar qildi. Ular kuzatuvchi sifatida qatnashadi, deya aniqlik kiritdi CNN.