Myanmada sodir bo‘lgan zilzila natijasida halok bo‘lganlar soni 1002 kishiga yetdi

Myanmada kecha sodir bo‘lgan 7,7 va 6,4 balli ikkita kuchli zilzila qurbonlari soni 1002 kishiga yetdi, yana 2376 kishi jarohat oldi.

Myanma harbiy maʼmuriyati matbuot xizmati maʼlumotlariga koʻra, 30 kishi hamon bedarak yoʻqolgan.

28-mart kuni Myanmaning markaziy hududlarida 7,7 va 6,4 balli ikkita kuchli zilzila sodir bo‘lib, sezilarli vayronagarchilik va ko‘p sonli qurbonlarga sabab bo‘ldi.

Zilzila epitsentri mamlakat poytaxti Neypitaudan shimolda joylashgan Sagaing Regency shahridan 16 kilometr shimoli-g‘arbda joylashgan. Zilzila o‘chog‘i 10 km chuqurlikda joylashgan.

Yer silkinishlari qo‘shni mamlakatlarda, jumladan, Tailandda ham sezilgan, Bangkokda qurilayotgan ko‘p qavatli bino qulab, olti kishi halok bo‘lgan va 22 kishi jarohatlangan.

Zilzilalar Myanma va Tailanddan tashqari Xitoyning Yunnan provinsiyasida ham vayronagarchilikka olib keldi. Qurbonlar va jarohatlanganlar haqida hozircha ma’lumotlar yo‘q.

Monastir, to'g'on va ko'prik vayron qilingan

Zilzilalar Myanma infratuzilmasiga jiddiy zarar yetkazdi. Zilzila eng kuchli sezilgan Myanmaning ikkinchi yirik shahri Mandalayda tarixiy Ma Soe Yane Buddist monastiri vayronalarga aylangani va boshqa vayronagarchiliklar haqida xabar berilgan.

Christian Aid gumanitar tashkilotiga ko'ra, yerdagi vakillar shahardagi to'g'on qulagani, pasttekislikdagi hududlarda suv sathining ko'tarilishiga sabab bo'lganini xabar qilgan. Zilzila epitsentri bo‘lgan Sagaing okrugida 90 yillik ko‘prik qulab tushgan, Mandalay va Yangon shaharlarini bog‘lovchi avtomagistral shikastlangan.

Mamlakat poytaxti Neypitauda zilzila oqibatida binolar, jumladan, diniy ibodatxonalar zarar ko‘rgan.

Harbiy ma’muriyat matbuot kotibi general-mayor Zav Min Tun jabrlangan hududlardagi shifoxonalarda qonning keskin tanqisligi kuzatilayotganini aytib, fuqarolarni jabrlanganlarga yordam berish uchun qon topshirishga chaqirdi.