Putin: Kiyev anneksiya qilingan hududlarni Rossiyaga tegishli deb tan olishdan bosh tortishi yangi urushga olib kelishi mumkin

Rossiya prezidenti Vladimir Putin Peterburg iqtisodiy forumining yalpi sessiyasidan so‘ng Sky News Arabia telekanaliga intervyu berdi. Unda u Rossiyaning urushni to‘xtatish shartlarini yana bir bor takrorladi.

Uning qayd etishicha, Moskva Zaporijjya va Xerson oblastlarining anneksiya qilingan qismlarida, shuningdek, o‘zini o‘zi mustaqil deb eʼlon qilgan DXR va LXRda o‘tkazilgan “referendumlar” natijalari Kiyev tomonidan tan olinishini talab qilmoqda. Uning fikricha, bu natijalarni eʼtiborsiz qoldirish «qurolli to‘qnashuvning qayta boshlanishi ehtimoli borligini anglatadi».

Bundan tashqari, Putin Ukraina betaraflikka, yaʼni hech qanday xorijiy ittifoqlarga qo‘shilmaslik va yadro qurolini joylashtirishdan voz kechishga rozi bo‘lishi kerak, deb hisoblaydi. Rossiya prezidentining fikricha, bunday qadamlar «mintaqadagi uzoq muddatli barqarorlik» uchun asosdir.

U Moskva va Kiyev 2022 yil bahorida Istanbulda kelishuvga yaqin bo‘lgani haqidagi so‘zlarini yana bir bor takrorladi.

«Umid qilamanki, Ukrainaning hozirgi rahbarlari uchinchi tomonning emas, milliy manfaatlarni ko‘zlagan holda ish tutadi. <…> Ukraina Rossiyaga qarshi ishlovchi tashqi kuchlar qo‘lidagi qurol bo‘lishdan yaxshiroq taqdirga loyiq», — deya Putinning so‘zlarini keltiradi Sky News Arabia. 

Kreml Qrim, DXR, LXR, Zaporijjya va Xerson oblastlari Rossiya tarkibiga kirishi tan olinishini talab qilayotgani haqida 2 iyun kuni Istanbulda bo‘lib o‘tgan to‘g‘ridan to‘g‘ri muzokaralarning ikkinchi raundida rossiyalik muzokaralar Ukraina tomoniga topshirgan memorandumda ham aytilgandi.

Kiyevning tinchlik taklifida esa Ukraina betaraf bo‘lib qolishi shart bo‘lmasligi va Yevropa ittifoqiga aʼzolik uchun harakatlarini davom ettirishi mumkinligi, NATOga aʼzolik esa alyansdagi konsensusga bog‘liqligi ko‘zda tutilgan. Bundan tashqari, Ukraina 2014 yil fevralidan buyon Rossiya tomonidan egallab olingan hududlar xalqaro hamjamiyat tomonidan tan olinmasligini talab qilgan. «Hududiy masalalar faqat to‘liq va so‘zsiz otashkesimdan keyingina muhokama qilinadi», — deyilgan memorandumda.