Rossiya va Ukraina halok bo‘lgan harbiylar jasadini almashdi

Rossiya va Ukraina yana halok bo‘lgan harbiylarning jasadlarini almashdi. Bu haqda 20 dekabr, juma kuni Ukraina harbiy asirlar bilan ishlash bo‘yicha muvofiqlashtiruvchi shtabi va Rossiya Davlat dumasi deputati Shamsail Saraliyev ma’lum qildi.

Ukraina tomoni xabaridan ma’lum bo‘lishicha, Rossiya Federatsiyasi Kiyevga 503 askarning jasadini topshirgan: ulardan 403 nafari Donetsk yo‘nalishida, 57 nafari Zaporijjya yo‘nalishida, 12 nafari Luhansk yo‘nalishida halok bo‘lgan. Yana 31 nafar jasad Rossiyadagi o‘likxonalardan olib kelindi.

Moskva, o‘z navbatida, 42 jasadni qabul qildi. Rossiya harbiy muxbiri Aleksandr Kotsning so‘zlariga ko‘ra, almashinuv Belarusning Gomel viloyatidagi Ukraina bilan chegarada bo‘lib o‘tgan.

Ukraina va Rossiya noyabr oxirida halok bo‘lgan askarlar jasadini almashgan

Ukraina Rossiya bilan navbatdagi almashinuv chog‘ida halok bo‘lgan 502 nafar himoyachining jasadini qaytarib oldi, deb xabar berdi Ukraina harbiy asirlar bilan ishlash bo‘yicha muvofiqlashtiruvchi shtab 29 noyabr kuni Telegramʼda. Shtabning aniqlik kiritishicha, gap Donetsk, Zaporijjya va Luhansk yo‘nalishlarida halok bo‘lgan ukrainalik askarlarning jasadlari haqida ketmoqda.

Bundan tashqari, Rossiya Federatsiyasidagi o‘likxonalardan 17 nafar jasad qaytarildi, deyiladi xabarda. Donetsk oblastida eng ko‘p ukrainalik himoyachilar jon berdi – 397. «Ekspert muassasalari bilan birgalikda halok bo‘lganlarning shaxsi imkon qadar tezroq aniqlanadi», — deyiladi shtabda.

O‘z navbatida, Rossiya Ukrainadagi urushda halok bo‘lgan Rossiya Qurolli kuchlarining 52 nafar askarining jasadini almashish doirasida oldi, dedi Rossiya Davlat dumasi deputati, parlament muvofiqlashtirish guruhi vakili Shamsail Saraliyev. Rossiya tomonidan almashinuv Rossiya Mudofaa vazirligi tomonidan amalga oshirildi.

Topshirilgan jasadlar sonidagi farqni Rossiya armiyasi hozir faol ilgarilab borayotgani, o‘lgan rus harbiylari esa bosib olingan hududda qolayotgani bilan izohlash mumkin, deydi ekspertlar.

Avvalgi jasadlar almashinuvi 8 noyabr kuni bo‘lib o‘tdi. O‘shanda halok bo‘lgan 563 harbiy xizmatchi Ukrainaga topshirildi, 37 nafarining jasadi esa Rossiyaga qaytarildi. Rossiya urushi boshlanganidan beri Rossiya va Ukraina muntazam ravishda halok bo‘lgan harbiy xizmatchilarning jasadlarini almashib kelyapti. Almashinuvga Xalqaro Qizil Xoch Qo‘mitasi (XQXQ) vositachilik qiladi.