Tramp va Si AQSh hamda Xitoy o'rtasidagi kelishmovchiliklarni bartaraf etish niyatida

AQSh prezidenti Donald Tramp va Xitoy prezidenti Si Szinpin mamlakatlari o'rtasidagi kelishmovchiliklarni bartaraf etish va Vashington va Pekin o'rtasidagi sheriklikni chuqurlashtirish niyatida. Ikkala rahbar ham bu haqda 30-oktabr, payshanba kuni Janubiy Koreyaning Pusan shahrida bo'lib o'tadigan muzokaralar oldidan e'lon qilishdi.

Tramp: Xitoy va AQSh allaqachon ko'p narsalarda kelishuvga erishdilar

Tramp Si Szinpinni "uzoq yillik do'st" va "buyuk mamlakatning buyuk rahbari" deb atadi. U AQSh va Xitoy "uzoq vaqt davomida ajoyib munosabatlarni" rivojlantirishiga umid bildirdi.

"Biz ba'zi muzokaralar olib boramiz. Menimcha, biz allaqachon ko'p narsalarda kelishuvga erishdik va hozirda yanada ko'proq narsada kelishamiz", dedi AQSh prezidenti.

Si: Xitoy va AQSh do'st bo'lishi kerak

"Dunyoning eng yirik ikki iqtisodiyoti o'rtasida vaqti-vaqti bilan ishqalanish paydo bo'lishi odatiy hol", dedi Si Tszinpin va "Xitoy va AQSh sherik va do'st bo'lishi kerak" degan fikrni ta'kidladi. "Men har doim Xitoyning rivojlanishi sizning Amerikani yana buyuk qilish haqidagi tasavvuringiz bilan chambarchas bog'liqligiga ishonaman", deb davom etdi Si.

Uning qo'shimcha qilishicha, AQSh va Xitoy delegatsiyalari yaqinda iqtisodiy va savdo masalalari bo'yicha muzokaralar o'tkazgan. "Ular bizning asosiy muammolarimizni hal qilish bo'yicha asosiy kelishuvga erishdilar", dedi Xitoy prezidenti.

Si Szinpin Trampga G'azodagi sulhga va Tailand va Kambodja o'rtasidagi mojaroni hal qilishga qo'shgan hissasi uchun minnatdorchilik bildirdi. Si Pekin dunyoning turli mintaqalarida ham tinchlikka intilishini qo'shimcha qildi.

AQSh va Xitoy rahbarlari jurnalistlarning savollariga javob berishmadi. Muzokaralarning yopiq qismi ochilish nutqidan so'ng darhol boshlandi.