2024-yilda O‘zbekistonning meva-sabzavot mahsulotlari eksporti 15,7 foizga oshgan

O'zbekiston meva-sabzavot mahsulotlarini ishlab chiqarish (yetishtirish) va ularning tashqi bozorlarga eksportini rivojlantirishda ulkan salohiyatga ega.

Qishloq xo‘jaligi vazirligi matbuot xizmatining maʼlum qilishicha, o‘tgan 2024-yilning yanvar-oktyabr oylarida Qirg‘iziston Respublikasi O‘zbekistondan 222 tonna quritilgan sabzavot import qilgan bo‘lib, ularning umumiy qiymati 152,8 ming AQSH dollarini tashkil etdi. 

Bu ko‘rsatkich 2023-yilning xuddi shu davriga nisbatan 61 foizga oshgan. Solishtirish uchun, o‘tgan yili ushbu davrda 137 tonna mahsulot import qilinib, umumiy qiymati 84 ming dollarni tashkil etgan edi. 

Mazkur o‘sish bir nechta omillar bilan izohlanishi mumkin. Birinchidan, O‘zbekistonning qishloq xo‘jaligi mahsulotlarini qayta ishlash va saqlash texnologiyalari sohasidagi yutuqlari mahsulot sifatini oshirdi. Quritilgan sabzavotlar, xususan, sog‘lom va uzoq muddat saqlashga yaroqli mahsulot sifatida, Qirg‘iz bozorida katta talabga ega bo‘lmoqda. 

Ikkinchidan, mintaqadagi logistika imkoniyatlarining yaxshilanishi va O‘zbekiston-Qirg‘iziston savdo aloqalarining kengayishi ushbu mahsulotlarni eksport qilish hajmini oshirdi. Qirg‘iz Respublikasi oziq-ovqat sanoati uchun zarur xomashyolarni O‘zbekistondan olib, ichki ishlab chiqarishni rivojlantirishni rejalashtirmoqda. 

Soha vakillarining fikricha, mazkur tendensiya ikki davlat o‘rtasidagi iqtisodiy hamkorlikning mustahkamlanayotganidan darak beradi. Shu bilan birga, O‘zbekiston uchun eksport hajmlarining o‘sishi qishloq xo‘jaligi sektorini rivojlantirishda muhim turtki bo‘lib, fermer xo‘jaliklari va qayta ishlash korxonalari daromadlarining oshishiga xizmat qiladi. 

Maʼlumot o‘rnida taʼkidlash lozimki, 2024-yilda O‘zbekistonning meva-sabzavot mahsulotlari eksporti 15,7 foizga oshgan. Shuningdek, mavjud qonunchilikka asosan, vakolatli organlarning meva-sabzavotlar, to‘qimachilik mahsulotlari va buyumlarini eksport qilish uchun zarur ruxsatnoma va sertifikatlarni rasmiylashtirish bilan bog‘liq xarajatlari O‘zbekiston Respublikasi Investitsiyalar va tashqi savdo vazirligi huzuridagi Eksportni rag‘batlantirish agentligi tomonidan qoplab berilish tartibi joriy qilingan.