Хитой компанияси Фарғонада чиқиндини қайта ишлаш мажмуасини қуришни режалаштирмоқда

Хитой компанияси Фарғонада водий вилоятларига хизмат кўрсатувчи чиқиндини қайта ишлаш мажмуасини қурмоқчи. Бу ҳақда вилоят ҳокимлиги матбуот хизмати хабар берди.

Вилоят ҳокими Хайрулло Бозоров Хитойнинг “China Tianying” компанияси директори Ван Кун бошчилигидаги компания вакилларини ва маҳаллий ҳамкорларини қабул қилди.

Учрашувда Фарғонада водий вилоятларига хизмат кўрсатувчи йирик чиқиндини қайта ишлаш мажмуаси барпо этиш лойиҳаси муҳокама қилинди.

Мажмуани компания томонидан ишлаб чиқарилган экологик тоза технологиялар асосида барпо этиш режалаштирилган. Лойиҳа қиймати дастлабки ҳисоб-китобларга кўра, $600 млн атрофида бўлиши белгиланган.

Фарғона вилоятида кунлик йиғиладиган 3 минг тоннадан зиёд чиқиндини ҳамда қўшни вилоятдаги чиқиндиларни қайта ишлаш ҳисобига электр энергияси, ўғит ҳамда қурилиш блоклари ишлаб чиқарилади.

Учрашувда лойиҳани амалга ошириш учун тегишли вазирликлар мутасаддилари иштирокида ишчи гуруҳ ташкил этишга ҳамда лойиҳанинг техник-иқтисодий асосларини ишлаб чиқишга, мавжуд чиқиндиларнинг морфологик таркиби таҳлилини амалга оширишга келишилди.

Шунингдек, мазкур жараёндан сўнг ишлаб чиқариладиган энергияни сотиб олиш нархи бўйича музокаралар ўтказилиши белгиланди.

Яқин кунларда вилоят ҳокимлиги ҳамда “China Tianying” компанияси ўртасида лойиҳани амалга ошириш бўйича ҳамкорлик келишуви имзоланади.

Izohlar: 0
Siz identifikatsiyadan o'tmadingiz
Ro'yxatda bo'lmay turib izoh qo'shish

Tepaga

Alpha version: 0.9.1.19 build 70112 | Инструменты