O‘zbekistonning meva-sabzavot mahsulotlari eksporti 15,7% ga oshdi

2024-yilning yanvar-oktabr oylarida O‘zbekiston 1,6 million tonna meva va sabzavot eksport qildi. Bu ko‘rsatkich o‘tgan yilning xuddi shu davri bilan solishtirganda 15,7% ga ko‘proqni tashkil qiladi.

Eksportning qiymati ham jiddiy o‘sdi: meva va sabzavotlar eksportidan tushgan daromad 29,8% ga oshib, $1,2 milliardga yetdi. Bu nafaqat hajmning, balki mahsulot sifatining ham xalqaro bozorda yuqori baholanganini ko‘rsatadi.

Asosiy eksport mahsulotlari

O‘zbekiston eksportida eng katta ulushni uzum, shaftoli va gilos egalladi:

Uzum: 174 ming tonna eksport qilinib, $147,2 million daromad keltirdi.
Shaftoli: 103,5 ming tonna hajmida sotilib, $96,9 million foyda olib keldi.
Gilos: 32,2 ming tonna miqdorida eksport qilinib, $70,3 million daromad ta’minlandi.

O‘zbekistonning eksport geografiyasi kengaymoqda, mahsulotlar esa ekologik tozaligi va tabiiyligi tufayli xalqaro bozorlarda yuqori talabga ega. Yangi texnologiyalarni joriy etish va intensiv bog‘dorchilikning rivojlanishi hosildorlikni oshirishga xizmat qilmoqda.

O‘zbekiston eksport faoliyatini rivojlantirishda qator davlatlar bilan muvaffaqiyatli hamkorlik aloqalarini yo‘lga qo‘ymoqda. Bu meva-sabzavot mahsulotlarini nafaqat Markaziy Osiyo bozoriga, balki Yevropa, Osiyo va Yaqin Sharq mamlakatlariga yetkazib berishga imkon bermoqda. Eksport hajmining oshishi mamlakat iqtisodiyoti uchun muhim bo‘lgan valyuta tushumlarini sezilarli ravishda ko‘paytiradi.