Toshkentda IUCN vakolatxonasini ochish jarayoni boshlandi

Dubayda boʻlib oʻtayotgan BMTning iqlim oʻzgarishi boʻyicha 28-konferensiyasi (COP28) doirasida Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vaziri Aziz Abduhakimov Xalqaro tabiatni muhofaza qilish ittifoqi (IUCN) Bosh direktori Dr. Gretel Aguilar bilan uchrashdi.

Uchrashuv "O‘zbekiston" pavilyonida bo‘lib o‘tdi. Vazir doktor G. Agilarni bosh direktor lavozimiga tayinlangani bilan tabrikladi va IUCN bilan yaqin va amaliy hamkorlikni davom ettirishga, shuningdek, O‘zbekistonda qo‘shma ekologik loyihalarni amalga oshirishga umid bildirdi.

Ma’lumot uchun, Doktor G. Agilar bu lavozimni 2023-yil 20-oktabrda egallagan. Unga qadar, 2020-2023-yillarda Doktor Bruno Oberle direktorlik qilgan.

Uchrashuvda bugungi kunda umumiy qiymati 22 million dollardan ortiq boʻlgan qoʻshma grant loyihalarini amalga oshirish boʻyicha hamkorlikda ish boshlangani, shundan 2 tasi milliy va 1 tasi hududiy loyiha ekanligi taʼkidlandi. Loyihalar atrof-muhitni muhofaza qilish, yerlarni tiklash, O‘zbekistonning qimmatli landshaftlari ekotizimlarini yaxshilash va iqlim o‘zgarishi sharoitida barqarorlikni ta’minlash, shuningdek, insoniy va institutsional salohiyatni rivojlantirishga qaratilgan.

Bundan tashqari, uchrashuvda tabiatni muhofaza qilish va boshqarish rejalarini ishlab chiqishda hamkorlik qilish, IUCN metodologiyasiga muvofiq yangilangan O‘zbekistonning yangi Qizil kitobini nashr etish, tashkilot mutaxassislari bilan yaqin hamkorlikni yo‘lga qo‘yish, Bonndagi Atrof-muhit huquqi markazi, muhofaza etiladigan tabiiy hududlarda boshqaruvni takomillashtirish bo'yicha hamkorlik masalalariga e'tibor qaratildi.

Qolaversa, Markaziy Osiyoda birinchi IUCN vakolatxonasini ochish masalasi ham muhokama qilindi.

“Bu oʻzaro hamkorlikni yanada mustahkamlaydi. Kelajakda bu idora MDH mamlakatlari uchun Markaziy Osiyoda markaz boʻlib xizmat qilishi mumkin, chunki vakolatxona Markaziy Osiyo davlatlari, hamkorlar va ekspertlar hamjamiyatlari bilan yaqinroq aloqa oʻrnatish imkonini beradi”, — deya qoʻshimcha qildi vazir.

IUCNning Toshkentdagi vakolatxonasining ochilish marosimi kelgusi yilning fevral oyida boʻlib oʻtadigan Yovvoyi hayvonlarning koʻchib yuruvchi turlarini saqlash boʻyicha konvensiya (CMS COP14) ishtirokchilari konferensiyasining 14-yigʻilishi doirasida oʻtkazilishi rejalashtirilgan. COP14 davomida IUCN pavilyoni, qoʻshma tadbirlar va koʻrgazmalar ham tashkil etiladi.

IUCN kelgusi yilda muhim ekologik konferensiyalar, jumladan, Abu Dabida 2024-yil 9-15-oktyabr kunlari Butunjahon tabiatni muhofaza qilish kongressi (WWC), Bryugge (Belgiya)da esa 2024-yil 30-sentabrdan 10-oktabrgacha Yevropa, Shimoliy va Markaziy Osiyo uchun tabiatni muhofaza qilish boʻyicha mintaqaviy forum  boʻlib oʻtishi ta'kidladi.