“Bu hali boshlanishi, o‘zbeklar hali ko‘p kelishadi”. Abduqodir Husanovning ilk intervyusi

20-yanvar kuni “Manchester Siti” klubi o‘zining rasmiy sahifalarida Abduqodir Husanovni jamoaga qo‘shib olganini e’lon qildi. O‘zbekistonlik futbolchi “shaharliklar” bilan 2029-yil iyunigacha mo‘ljallangan shartnoma imzoladi. Shu tariqa Abduqodir APLdagi birinchi o‘zbek futbolchisiga aylandi.

Klub rasmiy sahifalarida futbolchining “Manchester Siti” himoyachisi sifatidagi ilk rasmiy intervyusi e’lon qilindi. 

Abduqodir, “Manchester Siti”ga xush kelibsiz. Bizning futbolchilarimizdan biriga aylanish qanday bo‘lar ekan?

Men bu jamoaga qo‘shilganimdan juda ham xursandman. Bu jamoa — dunyoning eng yaxshi jamoalaridan biri. Men bu yerga sovrin yutgani keldim.

Bu siz uchun ayni vaqtdagi to‘g‘ri qaror ekaniga amin bo‘lishingizga nima sabab bo‘ldi?

Bu jamoa — juda katta jamoa. Murabbiyi eng yaxshi murabbiylardan biri. Shuning uchun keldim.

Shu vaqtgacha bosib o‘tgan kar’era yo‘lingiz haqida gapirib bera olasizmi?

Men birinchi “ToshKuch” degan jamoadan boshlaganman. “ToshKuch”dan “Bunyodkor” akademiyasiga o‘tganman. “Bunyodkor” akademiyasidan so‘ng professional futbolni Belarusda boshlaganman. 18 yoshimda u yerdan Fransiyaga, Fransiyadan esa mana “Manchester Siti”ga.

Nima uchun 45-raqamni tanladingiz? Avval ham bu raqam ostida o‘ynaganmisiz yoki buning boshqa sababi bormi?

Professional futbolni Belarusda 45-raqamda boshlaganman. Shuning uchun 45-raqamni tanladim.

Sizning o‘sishingiz juda tez kechdi. Juda ko‘p jamoalar sizga qiziqayotgani bo‘yicha bayonotlar berildi. Nima uchun sizni kuzatayotgan shuncha klub bo‘la turib ham “Siti”ni tanladingiz?

Aytib o‘tganimdek, [Manchester Siti] eng yaxshi jamoa, [Pep Gvardiola] eng yaxshi murabbiy, [APL] eng yaxshi chempionat.

O‘tgan yil davomida yoki undan avval “Siti”ning ko‘plab o‘yinlarini ko‘rishga imkon bo‘lganmidi? Bizning futbol o‘ynash uslubimiz haqida qanday fikrdasiz?

“Manchester Siti”ning o‘yinlarini ko‘rib kelaman. Yoshligimda ham ko‘rganman. O‘yini zo‘r, boshqacha, hammanikiga o‘xshamaydigan.

Pep Gvardiola bilan ishlash imkoniga ega bo‘lish qanchalik muhim? “Siti”ga kelish qarorida bu ham muhim omil bo‘ldimi?

Men har doim eng yaxshisini tanlaganman. Hozir ham eng yaxshisi bilan ishlash uchun keldim.

Yangi mamlakat, yangi liga. Hayotingizdagi bu barcha yangi chaqiriqlar oldida qanchalik hayajonlanyapsiz? Axir siz atigi 20 yoshdasiz, yoshsiz.

Men har doim qiyinchiliklar bilan kelganman. Hech narsada to‘xtash yo‘q.

Siz Premer ligada o‘ynaydigan ilk o‘zbek futbolchisiga aylanasiz. Bu siz va oilangiz uchun juda sharafli onlar bo‘lsa kerak. Uyingizda [bu voqealarga] munosabat qanday bo‘ldi?

Bu nafaqat man uchun, balki O‘zbekiston uchun. Angliyada birinchi o‘zbek, bu hali boshlanishi. O‘zbeklar ko‘p kelishadi.

O‘zbekiston jahon chempionatida hech qachon o‘ynamagan. Lekin sizlarda 2026-yilgi Jahon chempionatiga yo‘llanmani qo‘lga kiritish imkoniyati bor. Mamlakatingizdagi futbol va u qanday rivojlanayotgani haqida bizga ozgina gapirib bera olasizmi?

O‘zbekistonda futbolga e’tibor juda katta bo‘lyapti. Shu munosabat bilan hamma Jahon chempionatiga chiqishimizni o‘ylayapti va xohlayapti. Chiqishimizga bir qadam qoldi.

Sizning otangiz ham professional futbolchi bo‘lgan. Karerangizga u inson qanchalik katta ta’sir o‘tkazgan?

Men dadam qanday futbol o‘ynayotganlarini ko‘rganman. Menda ham qiziqish bo‘lgan, borganman. Va hozir bu darajaga chiqishimda ham dadam katta rol o‘ynaydilar. Har o‘yindan keyin, hatto mashg‘ulotlardan keyin xatolarni bitta-bitta gaplashib o‘tiramiz.

So‘nggi savol: Bu mavsum uchun shaxsiy va “Siti” futbolchisi sifatidagi rejalaringiz qanday?

Men bu yerga o‘sish uchun va sovrin yutish uchun keldim.

Rahmat Abduqodir, “Manchester Siti” futbolchisi sifatidagi karerangizda omad!

Sizga ham katta rahmat.

Intervyuni video ko‘rinishida quyidagi havola orqali tomosha qilish mumkin (suhbatda savollar ingliz tilida berilgan, Abduqodir Husanov ularga o‘zbek tilida javob bergan).