O‘zbekiston Qozog‘istonga 1-oktyabrgacha 16 mlrd kub metr suv jo‘natadi. Bu o‘tgan yilga nisbatan bir mlrd kub metrga ko‘p

O‘zbekiston joriy yilning 1-oktyabriga qadar Qozog‘istonga 16 milliard kub metr suv jo‘natadi. Bu haqda Qozog‘iston Respublikasi suv xo‘jaligi va irrigatsiya vaziri Nurjan Nurjigitov va O‘zbekiston suv xo‘jaligi vaziri Shavkat Hamrayev suv sohasida ikki tomonlama hamkorlikni chuqurlashtirish bo‘yicha qo‘shma ishchi guruhining 12-yig‘ilishida kelishib oldi.

Tomonlar o‘tgan suv yilida (2023-yil oktyabr – 2024-yil oktyabr) Qozog‘istonga 15 milliard kub metr suv jo‘natilganini qayd etdilar. Shunday qilib, joriy suv yilida bu hajm 1 milliard kub metrga oshishi kutilmoqda.

O‘zbekiston tomoni 2025-yilgi sug‘orish mavsumida “Do‘stlik” kanali orqali suvning barqaror ta’minlanishiga ham yordam beradi.

Bundan tashqari, vazirlar Qozogʻistonning Turkiston viloyati va Oʻzbekistonning Jizzax viloyati fermerlarini suv bilan taʼminlashni yaxshilash imkonini beruvchi davlatlararo kanallarda taʼmirlash ishlarini birgalikda olib borishga kelishib oldilar.

“Muhokama qilinadigan yana bir mavzu Sirdaryodagi suv hisobini avtomatlashtirish boʻldi. Ilgari biz bunday tizimlar o'rnatiladigan har bir mamlakatda 5 tadan dastlabki 10 ta nuqtani aniqlagan edik. Bugun biz loyihaning texnik-iqtisodiy asoslarini ishlab chiqish bo‘yicha texnik topshiriqlarni kelishib oldik. Fevral oyida xalqaro tashkilotlar vakillari ishtirokida qo‘shma ishchi guruhning yig‘ilishi bo‘lib o‘tadi, unda kelgusidagi hamkorlikdagi harakatlar muhokama qilinadi”,  – dedi Qozogʻiston Respublikasi suv xoʻjaligi va irrigatsiya vaziri Nurjan Nurjigitov.