Ilmiy va innovatsion faoliyat yurituvchi yuridik shaxslarning reyestrini joriy etish rejalashtirilmoqda

O‘zbekiston Oliy taʼlim, fan va innovatsiyalar vazirligi tomonidan «Ilmiy va innovatsion faoliyatni amalga oshiruvchi tashkilotlar faoliyatini muvofiqlashtirish va ularni qo‘llab-quvvatlashning tubdan yangi tizimini joriy etish to‘g‘risida»gi prezident farmoni loyihasi jamoatchilik muhokamasi uchun eʼlon qilindi.

Farmon loyihasi bilan 2025 yil 1 yanvaridan boshlab ilmiy tashkilotlarni moliyalashtirish bo‘yicha yangi tartib joriy etiladi. Unga ko‘ra:

• O‘zbekiston Respublikasining davlat byudjeti hisobidan ilm-fan xarajatlari uchun ajratilgan mablag‘lar doirasida saqlanayotgan va bazaviy moliyalashtirishga o‘tkazilgan ilmiy tashkilotlarning (keyingi o‘rinlarda — byudjet ilmiy tashkilotlari) ilmiy faoliyatini muvofiqlashtirish quyidagi tartibda amalga oshiriladi:

• byudjet ilmiy tashkilotlari tomonidan hisobot yilidan keyingi yil uchun ishlab chiqiladigan ilmiy-tadqiqot dasturlari ilmiy ishlanmalarning isteʼmolchisi bo‘lgan tashkilotlar talablaridan kelib chiqqan holda yuqori turuvchi vazirlik va idoralar orqali Oliy taʼlim, fan va innovatsiyalar vazirligi huzuridagi Innovatsion rivojlanish agentligi (keyingi o‘rinlarda — agentlik)ga ekspertizadan o‘tkazish uchun kiritiladi;

• agentlik ilmiy-tadqiqot dasturlariga kiritilishi taklif etilgan mavzularning ilm-fan va texnologiyalarni rivojlantirishning ustuvor yo‘nalishlarga muvofiqligi, ilmiy ishlanmalarning isteʼmolchisi bo‘lgan tashkilotlar talablari o‘rganilganligi, avval bajarilgan ilmiy-tadqiqotlarni takrorlamasligi va byudjet ilmiy tashkilotning faoliyat yo‘nalishiga mosligi yuzasidan ekspertizadan o‘tkazadi;

• belgilangan tartibda ekspertizadan o‘tkazilgan ilmiy-tadqiqot dasturlari agentlik tomonidan Oliy taʼlim, fan va innovatsiyalar vazirligi (keyingi o‘rinlarda — Vazirlik)ga kelishish uchun kiritiladi va kelishilgan ilmiy-tadqiqot dasturlari byudjet ilmiy tashkilotlarning yuqori turuvchi tashkiloti tomonidan tasdiqlanadi;

• bazaviy moliyalashtirishga o‘tkazilgan ilmiy tashkilotlarning tasdiqlangan ilmiy-tadqikot dasturlari ilmiy faoliyatga oid davlat dasturlarga ajratilgan mablag‘lar hisobidan moliyalashtirib boriladi;

• byudjet ilmiy tashkilotlari bo‘lgan vazirlik va idoralar har yili 1 noyabrga qadar agentlikka keyingi yillarda amalga oshiriladigan ilmiy-tadqiqot dasturlari loyihasini ko‘rib chiqish uchun kiritadi;

• belgilangan tartibda ko‘rib chiqilgan ilmiy-tadqiqot dasturlari vazirlik tomonidan kelishiladi va byudjet ilmiy tashkilotining yuqori turuvchi tashkiloti tomonidan tasdiqlanadi.

Vazirlikning Ilmiy va innovatsion faoliyat yurituvchi yuridik shaxslarning reyestri (keyingi o‘rinlarda — Reyestr)ni joriy etish yuzasidan taklifiga rozilik beriladi.

Loyihada belgilanishicha:

• reyestr elektron shaklda yuritiladi va reyestrga kiritilgan tashkilot o‘zining faoliyat turiga ko‘ra Agentlikning tegishli axborot tizimlaridan foydalanish huquqiga ega bo‘ladi;

• reyestrga kiritilgan tashkilotdagi xodimlar ilmiy-innovatsion faoliyat bilan shug‘ullanuvchi jismoniy shaxslarni shaxsiy identifikatsiya raqami (keyingi o‘rinlarda — shaxsiy identifikatsiya raqami)ga ega bo‘ladilar va Agentlikning axborot tizimlaridan o‘zlarining shaxsiy kabinetlari orqali belgilangan tartibda foydalanadilar;

• agentlik Reyestrga kiritilgan tashkilotdagi xodimlarni shaxsiy identifikatsiya raqami bilan taʼminlash choralarini ko‘radi;

• reyestrga kiritilgan tashkilotlarning ilmiy va innovatsion faoliyatiga doir maʼlumotlari Agentlikning axborot tizimlari, «Raqamli hukumat» tizimining idoralararo integratsiyalashuv platformasi va boshqa davlat axborot tizimlar bilan integratsiya orqali yagona elektron bazada to‘planadi;

• O‘zbekistonda ilmiy va innovatsion faoliyatning asosiy ko‘rsatkichlari Reyestrga kiritilgan tashkilotlar bo‘yicha jamlanadi.

Shuningdek, vazirlikning ilmiy faoliyatga oid davlat dasturlari doirasida doktorlik dissertatsiyasini bajarishga qaratilgan amaliy tadqiqot loyihalaridan (keyingi o‘rinlarda — dissertatsion tadqiqot loyihasi) iborat Yosh olimlarni qo‘llab-quvvatlash dasturlarini shakllantirish va amalga oshirish to‘g‘risidagi taklifiga rozilik berilishi ko‘zda tutilgan.

Yosh olimlarni qo‘llab-quvvatlash dasturlarini shakllantirish va bajarilishida quyidagilar belgilanadi:

• Yosh olimlarni qo‘llab-quvvatlash dasturlari har yili agentlik tomonidan o‘tkaziladigan bajarilishi uch yilga mo‘ljallangan dissertatsion tadqiqot loyihalari tanlovi natijalariga ko‘ra Vazirlik tomonidan tasdiqlanadi;

• dissertatsion tadqiqot loyihasiga rahbarlik qiluvchi (keyingi o‘rinlarda — loyiha raxbari) bir vaqtning o‘zida loyihaga muvofiq bajarilayotgan falsafa doktori (PhD) ilmiy darajasini olish uchun doktorlik dissertatsiyasini tayyorlaydigan izlanuvchining (keyingi o‘rinlarda — izlanuvchi) ilmiy rahbari hisoblanadi;

• dissertatsion tadqiqot loyihasida faqat bir nafar izlanuvchi loyiha ijrochisi sifatida kiritiladi va loyiha bajarilayotgan tashkilot uning asosiy ish joyi etib belgilanadi;

• loyiha ijrochisi loyiha rahbari tomonidan mustaqil o‘tkaziladigan tanlov natijalariga ko‘ra aniqlanadi va doktorlik dissertatsiyasini tuziladigan tegishli shartnomaga muvofiq loyiha bajarilayotgan tashkilotda mustaqil izlanuvchi sifatida amalga oshiradi;

• amaliy tadqiqot loyihasi uchun ajratiladigan mablag‘lar doirasida doktorlik dissertatsiyasini tayyorlash nazarda tutiladi.

Yosh olimlarni xorijiy ilmiy stajirovkaga yuborishni tashkil qilishda quyidagilar belgilanadi:

• 2025 yildan boshlab Vazirlar Mahkamasi tomonidan belgilanadigan tartibda yosh olimlarni yetakchi xorijiy ilmiy tashkilotlarga qisqa muddatli ilmiy stajirovkalarga yuborish bo‘yicha tanlovlarni tashkil etish, o‘tkazish, saralash va moliyalashtirish Ilm-fanni moliyalashtirish va innovatsiyalarni qo‘llab-quvvatlash jamg‘armasi tomonidan amalga oshiriladi;

• Ilm-fanni moliyalashtirish va innovatsiyalarni qo‘llab-quvvatlash jamg‘armasi mablag‘lari hisobidan xorijiy stajirovkaga faqat ilmiy faoliyat bilan shug‘ullanayotgan 35 yoshdan oshmagan xodimlar yuborilishi rejalashtirilmoqda.