“InnoWeek-2024” haftaligidan nimalar kutilyapti?

AOKAda Innovatsion rivojlanish agentligi rahbariyati ishtirokida o‘tkazilgan matbuot anjumanida “InnoWeek-2024” – Xalqaro innovatsion g‘oyalar haftaligiga ko‘rilayotgan tayyorgarlik, o‘tkaziladigan tadbirlar yuzasidan maʼlumot berildi.

“InnoWeek.Uz-2024” doirasida o‘tkaziladigan 120 dan ortiq V2V uchrashuvda 10 dan ortiq davlatdan 50 ga yaqin kompaniya vakili bilan investitsion va grant shartnomalarini imzolash kutilyapti.

“Uzekspomarkaz”ning ITC zalida yosh olimlarning “Fan va innovatsiyalar” xalqaro konferensiyasi ham o‘tkaziladi. Bu yilgi konferensiya nafaqat “InnoWeek.Uz-2024” innovatsion g‘oyalar haftaligi doirasida, balki “Science & Innovation for Peaceful and Sustainable Future” xalqaro yosh olimlar forumi homiyligida ham o‘tkazilayotgani bilan ahamiyatli.

“Fan va innovatsiyalar” konferensiyasi dolzarb ilmiy yo‘nalishlar va texnologiyalarning rivojlanishiga hissa qo‘shadigan bilim, tajriba va istiqbolli g‘oyalar almashinuvi uchun noyob platforma taqdim etadi.

Tadbir doirasida fan va innovatsiyalar kesishmasida yotgan eng dolzarb masalalar, shuningdek, ilg‘or texnologiyalar, tibbiyot, biologiya, geofizika va boshqa muhim sohalardagi yutuqlar muhokama qilinadi.

Haftalik doirasida “Ilmiy va innovatsion faoliyat bo‘yicha III xalqaro forumi” ham o‘tkaziladi.

Forum yakunida “Innovatsion g‘oyalar yetakchisi” ko‘krak nishoni sovrindorlarini taqdirlash marosimi bo‘lib o‘tadi. “Innovatsion g‘oyalar yetakchisi” ko‘krak nishoni bilan innovatsion g‘oya va texnologiyalarni rivojlantirish, amaliyotga tatbiq etishga munosib hissa qo‘shgan iqtidorli yoshlar, yosh olimlar, talabalar va tashabbuskor fuqarolar taqdirlanadi.

Shuningdek, haftalikda iqtidorli va muhandis yoshlar uchun alohida pavilion tashkil etilib, unda robototexnika, dron reysing, xakaton, art injiniring, VR/AR, 3D modellashtirish, dasturlash kabi yo‘nalishlardagi turli musobaqalarga 1200 dan ortiq yoshlar jalb qilinib, musobaqa yakuni bo‘yicha 70 nafar g‘olib taqdirlanadi.