Milliy statistika tizimi yanada takomillashadi va rivojlanadi

3-avgust kuni O'zbekiston Respublikasi Prezidentining “O'zbekiston Respublikasining milliy statistika tizimini yanada takomillashtirish va rivojlantirish chora-tadbirlari to'g'risida”gi qarori qabul qilindi.

Hujjat bilan Statistik ma'lumotlarning sifati hamda ishonchliligini yanada oshirish nazarda tutilgan.

Qarorda O'zbekiston Respublikasining milliy statistika tizimini takomillashtirishning quyidagi ustuvor yo'nalishlari belgilangan:

- statistika organlarini talab yuqori bo'lgan, sifatli va ishonchli ma'lumotlarni shakllantirishga, statistika ma'lumotlarining shaffofligi va oshkoraligini oshirishga qaratilgan professional mustaqil xizmatga aylantirish;

- statistika sohasida yagona siyosatni amalga oshirishga qaratilgan vakolat va majburiyatlarni mustahkamlash orqali O'zbekiston Respublikasi Davlat statistika qo'mitasi huzuridagi Statistika kengashining to'liq faoliyat ko'rsatishini ta'minlash;

- ilg'or axborot-kommunikatsiya texnologiyalaridan keng foydalangan holda statistika axborotlarini yig'ish, qayta ishlash, tahlil qilish, nashr etish va saqlash bo'yicha yaxlit tizimni tashkil etish;

- rasmiy statistikani ishlab chiqarish, tarqatish va muvofiqlashtirish maqsadida mamlakatning butun milliy statistika tizimi doirasida qo'llaniladigan uslubiy asoslar va boshqaruv tamoyillarini takomillashtirish;

- idoraviy ma'lumotlar bazalarini yagona ma'lumotlarni boshqarish tizimiga integratsiya qilish orqali kuzatuvlarni bosqichma-bosqich optimallashtirish va respondentlardan hisobot topshirish yukini kamaytirish, shuningdek, ro'yxatga olish ishlarini o'tkazish va yalpi statistika hisobotlarini tanlanma kuzatuvlar bilan almashtirish hisobiga statistikani shakllantirish tizimini takomillashtirish;

- Statistika ma'lumotlaridan foydalanuvchilar bilan samarali hamkorlik siyosatini yo'lga qo'yish va mavjud statistika ma'lumotlari to'g'risida jamoatchilikni xabardor qilish orqali foydalanuvchilarning statistika axborotlariga bo'lgan ishonchini oshirish;

- davlat statistika organlari faoliyatini moddiy-texnik qo'llab-quvvatlashni yanada yaxshilash, xodimlarning samarali ishlashi uchun munosib shart-sharoitlarni yaratish, shuningdek, axborot-kommunikatsiya texnologiyalarining samarali joriy etilishi hisobiga hududiy statistika organlari tuzilmalari va ularning vazifalarini bosqichma-bosqich maqbullashtirish;

- davlat statistika organlari xodimlarining kasbiy darajasini oshirish, ilmiy tadqiqotlarni olib borish hamda kelgusida amaliyotda qo'llash uchun ilg'or statistika usullari va texnologiyalari, shu jumladan, ochiq ma'lumotlar sohasida innovatsion ishlanmalarni ishlab chiqish.
Shuningdek, hujjatga muvofiq, Davlat statistika qo'mitasi rasmiy statistikani shakllantirish bilan bog'liq o'z vakolatlarini barcha davlat organlari va tashkilotlaridan mustaqil ravishda amalga oshiradi.

Qaror bilan Jahon banki ko'magida ishlab chiqilgan 2020-2025-yillarda O'zbekiston Respublikasi statistikasini rivojlantirishning milliy strategiyasi va uni amalga oshirish bo'yicha Yo'l xaritasi ham tasdiqlangan.

Qarorda statistika ma'lumotlarining shaffofligi, oshkoraligi va qulayligini oshirishni ta'minlash hamda dolzarb, sifatli va ishonchli statistikaning shakllantirishga oid vazifalar alohida qayd etilgan.