Namangan shahri tarkibida Davlatobod tumani tashkil etiladi

Oliy Majlis Senatining yettinchi yalpi majlisi oldidan bo'lib o'tgan Mudofaa va xavfsizlik masalalari qo'mitasining bugungi majlisida Namangan viloyati Namangan shahri tarkibida Davlatobod tumanini tashkil etish to'g'risidagi masala ham ko'rib chiqildi.
Davlatobod tumaniga 1977 yil 29 avgustda asos solingan bo'lib, uning hududi 1 125 gektarni tashkil qilgan.

Oliy Majlisning 2003 yil 12 dekabrdagi qaroriga asosan tuman tugatilib, 2004 yil 1 yanvardan Namangan shahri tarkibiga qo'shilgan.
Qaytadan tashkil etiladigan tumanning 4 686 gektar hududiga 2004 yil 1 yanvargacha faoliyat ko'rsatgan Davlatobod tumanining
1 125 gektar maydoni, shuningdek  2016-2019 yillarda Kosonsoy (227 gektar), To'raqo'rg'on (183 gektar) va Namangan (2 726 gektar) tumanlari hisobidan Namangan shahriga berilgan yerlar hamda  Namangan shahri “Yuksalish” mahallasining 425 gektar hududini kiritish nazarda tutilmoqda.

Yangidan tashkil etiladigan tuman hududida 25 ta mahalla fuqarolari yig'ini, shuningdek, Namangan xalqaro aeroporti, jami 303 km avtomobil yo'llari, 530 km gaz tarmog'i, 473 km elektr tarmog'i va 256 km ichimlik suv tarmoqlari mavjud.

Tashkil etiladigan tuman aholisi soni 140 000 nafarni tashkil etadi. Qo'mita raisi Qutbiddin Burxanov ta'kidlab o'tganidek,  Davlatobod tumani shahar tarkibidagi tuman toifasiga kiritilib, tuman hokimligi tashkil etilishi natijada  boshqaruv samaradorligi yaxshilanadi, hududda amalga oshirilayotgan ijtimoiy-iqtisodiy rivojlantirish dasturlarning yuqori samarasi ta'minlanadi.

Istiqbolda ushbu hududda zamonaviy ko'p qavatli uylar qurilishi hisobiga urbanizatsiya jarayoni jadallashadi.