O‘zbekistonda xalqaro darajadagi innovatsion ijtimoiy tarmoq yaratish maqsadida “startap” loyihalar tanlovini e’lon qilindi

Oʻzbekiston Respublikasi Innovatsion rivojlanish vazirligi tomonidan "Milliy messenjer va ijtimoiy tarmoq yaratish" bo'yicha "startap" loyihalar tanlovi e’lon qilindi. Mazkur tanlov yurtimizda xalqaro darajadagi innovatsion ijtimoiy tarmoq yaratish maqsadida amalga oshirilmoqda. Loyihalarni qabul qilish uchun arizalar shu yilning 1-oktyabriga qadar qabul qilinadi.

Ma’lum bo’lishicha, “startap” tashabbuskori– loyiha asoschilaridan boʻlishi yoki kompaniya boʻlsa, asosiy ulushdorlardan boʻlishi lozim.

Shuningdek, bunda ishtirokchi faqatgina 1 ta loyiha bilan qatnasha oladi. Tayyor dasturiy mahsulot, xizmatlar va texnologiyalar yaratishning hamda vazirlik tomonidan moliyalashtirishning eng koʻp muddati 1 yildan oshmasligi qayd etildi.

Startap loyihalar quyidagi mezonlar asosida baholanadi:

Respublikada avval qoʻllanilmagan yangi texnologiyalar va xizmat turini yaratish;

Loyiha jamoasining tegishli soha mutaxassislari bilan ta’minlanishi, ilmiy-texnik va ishlab chiqarish imkoniyatlari , tashkilotda kerakli asbob-uskunalar va ilmiy obyektlar infratuzilmalarining mavjudligi;

Moliyaviy ta’minotining rejalashtirilayotgan ishlarga muvofiqligi va harajatlar smetasining asoslanganligidir;

Loyihani amalga oshirish strategiyasi, bozor hajmi, maqsadli auditoriya, aloqalar/sotuvlarning asosiy kanallari, raqobat muhiti;

Ajratiladigan mablagʻlardan maqsadli va samarali foydalanish, amalga oshiriladigan tadbirlarni bajarish sifati va muddatlari, import oʻrnini bosuvchi va eksportga yoʻnaltirilgan ilmiy asos talab qiladigan mahsulot ishlab chiqarishni tashkillashtirish.

Tanlovga taqdim etiladigan loyihalar messenjer.startap@gmail.com  elektron pochtasiga quyidagi hujjatlar asl nusxalari tasdiqlangan holda pdf shaklida yuborilishi lozim:

Startap loyiha muallifi tomonidan imzolangan ariza;

Startap loyiha pasporti;

Xarajatlar smetasi;

Startap loyiha biznes matni (imzo va muhr qoʻyilgan holda);

Loyiha taqdimoti (10 slayd ) yoki planshet shaklida loyiha mazmuni toʻliq yoritilganligi (5 daqiqadan oshmaydigan video shaklida tayyorlangan ma’lumotlar ma’qullanadi).

Taqdim etilgan loyihalar tanlov talablariga qat’iy rioya qilinganligi, loyiha materiallarining ishonchliligi va haqqoniyligi, koʻchirmachilikka (plagiat) yoʻl qoʻyilmaganligi, talablar asosida shakllantirilganligi, shuningdek, startap loyiha yakunida qoʻlga kiritiladigan muhim natijalarning tadqiqot dizayniga muvofiq toʻliq asoslanganligi va soʻralgan mablagʻlarning tanlov shartlarida keltirilgan moliyalashtirish hajmiga muvofiq toʻgʻri hisob-kitob qilinganligi boʻyicha dastlabki texnik ekspertizadan oʻtkaziladi.

Bir necha hollarda taqdim etilgan loyihalar tanlovda ishtirok etish uchun tavsiya etilmasligi mumkin.

Startap loyihalarni elektron roʻyxatdan oʻtkazish bilan bogʻliq texnik masalalari va tanlov bosqichlari boʻyicha tanlovning texnik jihatdan qoʻllab-quvvatlash xizmati: +998-71-203-32-23 (ichki raqam: 216)