O'zbekiston jurnalistika va ommaviy kommunikatsiyalar universiteti rasman ochildi

Yangicha yondashuv va yangicha qarash mazkur universitet faoliyatiga asos qilib olindi. Davlat tomonidan ajratilgan bino ta'mirdan chiqarilib, innovatsion ishlanmalar hamohangligida talabalar ta'lim olishi uchun kreativ muhit yaratildi.

O'zbekiston jurnalistika va ommaviy kommunikatsiyalar universitetining o'z bayrog'i va madhiyasi bor. Universitet hududida kub bilan o'ralgan qalam aks ettirilgan installyatsiya o'rnatilgan bo'lib, bu jurnalistikaning to'rtinchi hokimiyat ekanini ifodalaydi. Universitet rahbariyati birinchi kursga qabul qilingan talabalarni yaqin bir necha yil ichida mutaxassis kadr bo'lib yetishishiga ishonch bildirmoqda.

Universitetga 2018-2019 o'quv yili uchun 182 nafar talaba, ulardan 101 nafari bakalavriyat, 31 nafari magistatura, 50 nafari sirtqi bo'limga qabul qilindi. Bu esa yaqin orada sohaga huddi shuncha intiluvchan, o'ziga va kasbiga ishonchi yuqori bo'lgan yosh kadrlar kirib kelishidan dalolat beryapti.

Tadbir davomida O'zbekiston va yangi tashkil etilgan OTMning madhiyasi sadolari ostida davlat hamda universitet bayroqlari ko'tarildi. Shundan so'ng, tadbir ishtirokchilari universitetni rasman ochiq deb e'lon qilish uchun ramziy qizil tasmani kesishdi.

Universitetning ochilish marosimida qatnashgan mehmonlar yoshlar uchun yaratilgan imkoniyatlar bilan yaqindan tanishtirildi. Bu yerda teleradio, gazeta, internet, media yo'nalishlarida bilim olish niyatida bo'lgan talabalarga nafaqat nazariy, balki amaliy tajriba orttirishlari uchun ham barcha sharoitlar yaratilgan. Qulay kutubxona, “Wi-Fi” deysizmi kinoteatrgacha barchasi muntazir.

Ma'lumot o'rinda, bakalavr bosqichida talabalar bosma OAV, telejurnalistika, internet jurnalistikasi, mediamarketing va reklama, mediadizayn, sport jurnalistikasi axborot xizmati va jamoatchilik bilan aloqalar, xalqaro jurnalistika yo'nalishlarida tahsil oladilar. Yangi yo'nalishlar magistratura bosqichida ham joriy etilgan. Xullas, yangi universitetda jurnalistika sohasida ta'lim olish uchun barcha sharoitlar yaratilgan, bundan unumli foydalangan talabalar esa tili va qalami o'tkir jurnalist bo'lib yetishishiga ishonamiz.