Samarqandda xalqaro sammit oldidan elektr taʼminoti tizimi qayta taʼmirlandi

Joriy yilning 3-5 aprel kunlari Samarqand shahri “Markaziy Osiyo – Yevropa Ittifoqi”ning birinchi rasmiy sammiti hamda “Markaziy Osiyo global iqlim tahdidlari qarshisida: umumiy farovonlik yo‘lida birdamlik” mavzusidagi xalqaro anjumanga mezbonlik qiladi.

Ushbu nufuzli tadbirlarga tayyorgarlik doirasida shaharning elektr taʼminoti yana-da takomillashtirildi. “Hududiy elektr tarmoqlari” AJ va uning Samarqand filiali tomonidan tegishli chora-tadbirlar amalga oshirildi.

Jumladan, sammit o‘tkaziladigan obyektlarni uzluksiz elektr energiyasi bilan taʼminlash maqsadida 14 ta podstansiya, 5 ta taqsimlash tarmog‘i, 64 ta transformator punktlari hamda 525 km elektr uzatish tarmoqlari texnik ko‘rikdan o‘tkazildi. Shuningdek, 35-110 kV kuchlanishdagi bir nechta havo elektr uzatish tarmoqlari ham tekshirilib, aniqlangan kamchiliklar bartaraf etildi.

“Registon” podstansiyasidan chiquvchi yirik elektr tarmoqlarida qo‘shimcha modernizatsiya ishlari olib borildi. Shuningdek, shaharning tarixiy obidalari va ziyoratgohlarini elektr bilan taʼminlaydigan 16 ta transformator punktlari tekshirilib, uchtasida yangi elektr qurilmalari o‘rnatildi.

Sammit doirasida elektr taʼminotiga bo‘lgan ehtiyojni qoplash maqsadida Samarqandga 10 ta “Damas” avtomashinasi, 3 ta ISUZU maxsus texnikasi hamda zamonaviy UPS qurilmalari yetkazib berildi.

Shuningdek, 8 ta tezkor xizmat ko‘rsatish brigadasi tashkil etilib, ular zarur texnik vositalar va materiallar bilan taʼminlandi. Qo‘shimcha ravishda 7 ta mobil dizel elektr stansiyasi (DES) va 12 ta UPS qurilmasi tarmoqqa ulandi.

Tadbir davomida elektr taʼminoti uzluksizligini taʼminlash maqsadida mutaxassislar 24 soatlik navbatchilikda bo‘ladi.