Sentyabrda qanday ob-havo bo‘lishi kutilayotgani maʼlum qilindi

“O‘zgidromet” xabariga ko‘ra, sentyabr oyining birinchi o‘n kunligida qulay harorat fonida asosan kam bulutli va quruq ob-havo bo‘lishi kutilmoqda.

Kechalari va erta tongda +15...+20 daraja bo‘lgan haroratda tetiklantiruvchi salqinlik seziladi, kunduz kunlari esa quyosh nurlari havoni +35 darajagacha, ayrim kunlarda +37 darajagacha isitadi.

Keyinchalik sentyabr oyining oxirigacha harorat kechalari +15...+20 dan +8...+13 darajagacha, kunduz kunlari +30...+35 dan +20...+25 darajagacha o‘zgarib turishi kutilmoqda.

Sentyabr oyida o‘rtacha oylik harorat meʼyor atrofida, baʼzi joylarda meʼyordan 1-1,5 darajaga yuqori bo‘lishi kutilmoqda.

Oyning ikkinchi yarmida ayrim kunlarda (1-2 kun) qisqa muddatli yomg‘ir yog‘ishi mumkin.

“O‘zgidromet” xabariga ko‘ra, eng sovuq (meʼyordan 2-3,5 darajaga past) sentyabr oylari 1930 va 1931 yillarda, so‘nggi o‘n yillikda esa 1992 va 1994 yillarda qayd etilgan. Eng iliq (meʼyordan 1,5-3,5 darajaga yuqori) sentyabr oylari esa 2013, 2016, 2021, 2022 yillarda, yaʼni ushbu asrda kuzatilgan bo‘lib, bu global isish tendensiyasiga mos keladi.

Taʼkidlanishicha, O‘zbekistonda sentyabr - yilning eng quruq oylardan biridir. Sentyabr oyida yomg‘ir kamdan-kam (oyiga 1-3 marta) yog‘adi. Shunday yillar kuzatilganki, butun O‘zbekistonda yoki hududning katta qismida sentyabr oyida umuman yomg‘ir yog‘magan. Bu asrda bunday anomal quruq sentyabr oylari 2007 va 2021 va 2022 yillarda qayd etilgan.