Tadbirkor prezidentdan shaxsga doir va bank maʼlumotlarini Cloud‘da saqlashga ruxsat berishni so‘radi

20-dekabr kuni, prezident Shavkat Mirziyoyev tadbirkorlar bilan ochiq muloqot o‘tkazdi. Tadbirda ishtirok etgan TBC Group vakili Oliver Hyuz shaxsga doir hamda bank maʼlumotlarini Cloudʼda saqlashga ruxsat berish uchun qonunchilikka o‘zgartirish kiritish taklifini ilgari surdi.

“Menda baʼzi savollar mavjud. Bu yerda sanoat va bank sektori nomidan gapiryapman, deb o‘ylayman. Savolim bulut, yaʼni Cloud haqida. Bugungi kunda banklar uchun maʼlumotlarni saqlashga nisbatan talablar juda qattiq. Ularni o‘z hisoblash markazlarimizda saqlashimiz kerak, bu juda qimmat va uni kengaytirish qiyin. Hozircha yaxshi, lekin biz qancha uzoqqa bormoqchi bo‘lsak, bu qiyinlashib boraveradi.

Bu butun mamlakatdagi texnologik kompaniyalarining rivojlanishiga to‘sqinlik qilishi mumkin. Shuning uchun hozir hukumat, Markaziy bank, hamkasblarimiz bilan gaplashyapmiz. Biz banklarga o‘zlarining maʼlumotlarini Cloud‘da, O‘zbekistonda va hatto ofshor hududlarda saqlashga ruxsat berishni qonunchilikka kiritishni taklif qilmoqchimiz.

Bu nafaqat texnologiya sanoati va bank sektori, balki sunʼiy intellektni rivojlantirish uchun ham juda muhimdir. Chunki sunʼiy intellekt juda katta hisoblash quvvatini talab qiladi, bu esa bugungi kunda O‘zbekistonda yo‘q. Biz buni allaqachon amalga oshirishni boshlayapmiz, SI botlarini chiqarishni yo‘lga qo‘ydik va muammolarga duch kelyapmiz”, dedi Xyuz.

Prezident masala o‘ta jiddiyligini qayd etib, har tomonlama puxta o‘ylangan yechim zarurligini taʼkidladi.

“Aslini olganda, bu to‘g‘ri savol. Sunʼiy intellekt bizning kelajagimiz. Bunga albatta jiddiy eʼtibor qaratishimiz kerak. Qo‘chqorov, Markaziy bank, adliya vaziri – birgalikda o‘ylab, menga taklif beringlar. Faqat to‘g‘ri qarorlar qabul qilishimiz kerak.

Fuqarolarning shaxsiy maʼlumotlari haqida gaplashyapmiz. Bu juda jiddiy masala. Xato qilishga haqqimiz yo‘q”, dedi davlat rahbari.