Toshkentda uy-joy ijarasi bozori mart oyida barqaror qolib, narxlarda o‘zgarishlar qayd etilmadi

Joriy yilning birinchi choragi yakunlariga ko‘ra, Toshkentda uy-joy ijarasi bozori mart oyida barqaror qolib, narxlarda o‘zgarishlar qayd etilmadi. Bu haqda Iqtisodiy tadqiqotlar va islohotlar markazi tahlilida qayd etilgan.

Ko‘chmas mulk bozoridagi faollik ketma-ket ikkinchi oy pasayishda davom etmoqda. Mart oyida bitimlar hajmi 8,8%ga kamayib, 20,4 mingtani tashkil etdi.

Shunga qaramay, bozor yillik ko‘rsatkichlarda barqaror o‘sishni ko‘rsatmoqda — mart oyida tuzilgan bitimlar soni 2024-yilning mos davriga nisbatan 15%ga oshdi.

2025-yilning birinchi choragi yakunlariga ko‘ra, bitimlar umumiy soni 68,4 mingtaga yetib, o‘tgan yilga nisbatan 10,8%ga o‘sdi.

Hududlar kesimida aollikning eng sezilarli o‘sishi Jizzax (34%) va Navoiy (29%) viloyatlarida qayd etildi.

Shu bilan birga, 2021-yilda tizimli kuzatuvlar boshlanganidan buyon birinchi marta, birinchi chorak yakuniga ko‘ra, biron bir hududda savdo hajmining pasayishi qayd etilmadi.

Toshkentda ko‘chmas mulk bozori

Mart oyida Toshkent shahri ko‘chmas mulk bozorida ikkilamchi uy-joylarning o‘rtacha narxi 0,6%ga, birlamchi bozor narxlari esa 0,4%ga kamaygan.

O‘tgan yilning mart oyiga nisbatan ikkilamchi uy-joylarning o‘rtacha narxi 5,7%ga kamaygan bo‘lsa, birlamchi uy-joy segmentida pasayish 3,7%ni tashkil etdi.

Yillik hisobda Toshkent shahri bo‘yicha ikkilamchi uy-joy narxida eng katta pasayish Mirobod (8%), Chilonzor (8,7%) va Yashnobod (7,5%) tumanlarida kuzatildi.

Yangi uylar narxlarida ham pasayish kuzatildi. Yil davomida bir kvadrat metr uchun o‘rtacha narxlarda eng sezilarli pasayish Shayxontohur (14,7%), Uchtepa (11%) va Yunusobod (6,7%) tumanlarida qayd etildi.

Toshkentda uy-joy ijarasi

Mart oyida Toshkent shahrida ijara narxlarida o‘zgarish kuzatilmadi va o‘rtacha ijara narxi bir kvadrat metr uchun $8ni tashkil etdi.

Poytaxtning Mirobod, Shayxontohur va Yakkasaroy tumanlarida ijara narxi nisbatan yuqoriligicha qolmoqda. Ushbu tumanlarda ijara narxi bir kvadrat metr uchun o‘rtacha $10ni tashkil etadi.

Shu bilan birga, Toshkent shahrida ijara narxi yillik hisobda 7,4%ga pasaygan. Narxlarning eng katta pasayishi Mirzo Ulug‘bek, Yashnobod va Chilonzor tumanlarida qayd etilib, pasayish sur’ati o‘rtacha 10%ga yetadi.

Ikkilamchi uy-joy bozori

Mart oyida mamlakatda ikkilamchi bozorda uy-joylarning o‘rtacha narxi fevral oyi darajasida qoldi. Yillik hisobda bir kvadrat metr uy-joy narxi 0,9%ga oshdi.

Hududlar kesimida eng sezilarli o‘sish Jizzax (12,3%), Surxondaryo (10,7%) va Qashqadaryo (8,5%) viloyatlarida kuzatildi.