AQSh Avstraliyaning Amerika tanklarini Kiyevga berishiga to‘sqinlik qilyapti

AQSh ma’muriyati Avstraliyaga Amerikaning M1A1 Abrams tanklarini Ukrainaga topshirishga ruxsat bermayapti. Avstraliyaning ABC telekanali 28 aprel, dushanba kuni xabar berishicha, Kanberra hukumati Kiyevga 245 million dollarlik harbiy yordam paketini e’lon qilganidan keyin olti oydan ko‘proq vaqt o‘tgan bo‘lsa ham, tanklar jo‘natilishi uchun yakuniy tasdiqni kutmoqda.

Avstraliya harbiylari Ukrainaga 2024 yilda va’da qilingan tanklarni yetkazib berish kechikishini qisman AQSh qarshiligi bilan bog‘lamoqda. Topshirish jarayoni davom etmoqda va M1A1 Abrams'ni yetkazib berish 2025 yilga «rejalashtirilgan», deya xabar beradi ABC Avstraliya Mudofaa vazirligiga tayanib.

Mudofaa vazirligi Kiyevdagi hukumat bilan ish olib borish bo‘yicha kelishuvlarga muvofiq ishlashda davom etmoqda va Avstraliya Rossiya bosqinidan himoyalanayotgan Ukrainani qo‘llab-quvvatlashga sodiq qoladi, deya qo‘shimcha qildi matbuot kotibi. ABC ta’kidlaganidek, Avstraliya 2007 yilda sotib olingan, jangovar hududlarda hech qachon foydalanilmagan 59 ta M1A1 Abrams tanklarini foydalanishdan chiqardi. Ularning o‘rnini zamonaviyroq M1A2 jangovar tanklari egallaydi.

Biroq, vaziyat bilan tanish bo‘lgan agentlik rasmiylari AQShning rasmiy roziligi yo‘qligi sababli jarayonda noaniqlik borligini ta’kidlamoqda. Bundan tashqari, Avstraliya M1A1 tanklarini texnik kamchiliklari tufayli Ukrainaga topshirish maqsadga muvofiqligiga shubha qila boshladi. «Bak qopqog‘i Abrams'ning eng zaif nuqtasidir, gap esa dronlar urushi haqida ketyapti», deb tushuntirdi harbiy amaldorlardan biri kanalga.