ISHID rahbarining bevasi o‘limga hukm qilindi

Iroq sudi “Islomiy davlat” (ID) terrorchilik guruhining tugatilgan yetakchisi Abu Bakr al-Bag‘dodiyning birinchi rafiqasi Asmo al-Kubaysini yazidiylar jamoasidan bo‘lgan ayollarga qarshi IShID jinoyatlarida ishtirok etgani uchun o‘lim jazosiga hukm qildi. Sudyalar kengashi maʼlumotlariga koʻra, tegishli qaror Al-Karx (Bagʻdod gʻarbidagi tuman) jinoyat ishlari boʻyicha sudi tomonidan qabul qilingan.

INA axborot agentligiga tayanib, uning bayonotiga koʻra, al-Bagʻdodiyning bevasi “yazidiy ayollarni oʻz uyida saqlagan, soʻng ularni IShID toʻdalariga topshirgan”. Unga qarshi qaror 2005-yildagi "Terrorizmga qarshi kurash" qonuni hamda 2021-yildagi "Zo'ravonlikdan omon qolgan yazidiy ayollar" qonuni qoidalariga muvofiq chiqarilgan.

Sky News Arabia telekanali xabariga ko‘ra, al-Bag‘dodiyning Ummu Huzayfa laqabi bilan tanilgan beva xotiniga nisbatan o‘lim jazosini talab qiluvchi da’voni yazidiylar qo‘zg‘atgan, ular uni o‘z jamoasidagi qizlarni o‘g‘irlash va qul qilishda ayblagan. Sud jarayonida Al-Kubaisi o‘ziga qo‘yilgan barcha ayblovlarni rad etdi.

Yazidiylar Iroqdagi kurd tilida so‘zlashuvchi etnik-diniy ozchilik bo‘lib, ildizlari zardushtiylikdan kelib chiqqan yazidiylikka e’tiqod qiladi. 2014-yilda IShID to‘dalari yazidiylar ixcham istiqomat qiladigan Sinjar tog‘li hududiga bostirib kirib, ularga qarshi shafqatsiz qatag‘onlarni amalga oshirdi. 2016-yil iyun oyida BMTning Suriyadagi inson huquqlari buzilishini tergov qilish komissiyasi “Islomiy davlat” guruhi yazidiylar jamoasiga qarshi genotsid, urush jinoyatlari va insoniyatga qarshi jinoyatlar sodir etishda aybdor degan xulosaga keldi.

Ma'lumot o'rnida, 2019-yilning 27-oktabr kuni AQSh prezidenti Donald Tramp “Islomiy davlat” yetakchisi Abu Bakr al-Bag‘dodiy AQShning Suriyaning Idlib viloyatidagi harbiy amaliyoti chog‘ida o‘ldirilganini e’lon qildi.