Kim Chen In Ukrainada halok bo‘lgan KXDR askarlari xotirasiga hurmat bajo keltirdi
Pxenyandagi tantanali marosimda KXDR yetakchisi Ukrainaga qarshi Rossiya Federatsiyasi tomonida jang qilgan askarning tobutiga bayroq qo‘ydi. Marosim Rossiya bilan strategik sheriklik shartnomasi imzolanganining bir yilligi munosabati bilan bo‘lib o‘tdi.
Shimoliy Koreya yetakchisi Kim Chen In Rossiyaning Ukrainaga qarshi urushida halok bo‘lgan KXDR askarlariga hurmat bajo keltirdi. KXDR davlat televideniyesi 1-iyul, seshanba kuni Kim Pxenyandagi marosim chog‘ida askarlardan birining tobutiga Shimoliy Koreya bayrog‘ini qo‘ygani aks etgan kadrlarni namoyish etdi. Shimoliy Koreya rahbariga Rossiya madaniyat vaziri Olga Lyubimova hamrohlik qildi.
Xabarda aytilishicha, 29-iyun, yakshanba kuni bo‘lib o‘tgan marosim Shimoliy Koreya va Rossiya o‘rtasida harbiy kelishuv imzolanganining yilligi munosabati bilan bo‘lgan. Ikki davlat oʻrtasidagi “Har tomonlama strategik sheriklik” shartnomasida mudofaa sohasida oʻzaro yordam koʻrsatish bandi ham oʻrin olgan.
Moskvaning eng muhim ittifoqchilaridan biri
Shimoliy Koreya Rossiyaning Ukrainaga qarshi agressiv urushida Moskvaning eng muhim tarafdorlaridan biridir. Aprel oyida Pxenyan o‘z askarlari va qurol-yarog‘larini Rossiyaga yuborganini tasdiqladi. Rossiyaning Ukraina bilan chegaradosh Kursk viloyatida Shimoliy Koreya qo‘shinlari Ukraina qo‘shinlarini Rossiya hududidan quvib chiqarish uchun Rossiya bilan birga jang qilgan. Janubiy Koreya ma’lumotlariga ko‘ra, janglarda Shimoliy Koreyaning 600 ga yaqin askari halok bo‘lgan, minglab askarlar yaralangan.
Janubiy Koreya Mudofaa vazirligi seshanba kuni Shimoliy Koreya qo‘shinlarini keyingi safarbar qilishdan "hech qanday alomat" yo‘qligini aytdi.
.png "YouTube UZREPORT TV")
