Kreml Putin va Shols suhbati tafsilotlarini ochiqladi

Kreml Rossiya prezidenti Vladimir Putin va Germaniya kansleri Olaf Shols o‘rtasidagi telefon muloqoti mazmuni haqida gapirdi. Bu ularning 2022-yil dekabridan beri birinchi suhbati edi. Qayd etilishicha, suhbat nemis tomonining tashabbusi bilan bo‘lib o‘tgan.

“Ukrainadagi vaziyat yuzasidan batafsil va ochiq fikr almashildi. Vladimir Putin hozirgi inqiroz NATOning ko‘p yillik agressiv siyosatining to‘g‘ridan-to‘g‘ri natijasi ekanini eslatib o‘tdi, bu esa Ukraina hududida Rossiyaga qarshi tramplin yaratish, bunda mamlakatimizning xavfsizlik manfaatlariga e’tibor bermaslik va rus tilida so‘zlashuvchi aholi huquqlarini oyoq osti qilishga qaratilgan”, — deyiladi Kreml xabarida.

Rossiya prezidenti Ukraina boʻyicha kelishuvlar Rossiya Federatsiyasining xavfsizlik sohasidagi manfaatlarini hisobga olishi va yangi hududiy voqeliklarga asoslanishi kerakligini taʼkidladi. Davlat rahbari Moskva hech qachon mojaroni siyosiy-diplomatik yoʻl bilan hal qilishdan voz kechmaganini va iyun oyida Tashqi ishlar vazirligida bildirilgan takliflar asosida muzokaralar uchun ochiq ekanini taʼkidladi.

Putin, shuningdek, Rossiya va Germaniya munosabatlarining yomonlashuviga Berlinning do‘stona bo'lmagan munosabati sabab bo‘lganini aytdi. Prezident Moskva har doim energetika sohasida o‘z majburiyatlarini bajarib kelganini va hamkorlikni davom ettirishga tayyorligini ta’kidladi.

Bundan tashqari, Putin Sholsga Moskvaning Yaqin Sharqdagi vaziyatni tinch yo‘l bilan tartibga solish borasidagi sa’y-harakatlari haqida gapirib berdi.

Avvalroq, muzokaralar mazmuni Germaniya hukumati tomonidan oshkor qilingan edi. Ular Olaf Sholsning Rossiya-Ukraina mojarosiga chek qoʻyish zarurligini taʼkidlagani va shu munosabat bilan Rossiyani Ukrainadan qoʻshinlarini olib chiqib, muzokaralarni boshlashga chaqirgani haqida xabar berishdi. Shu bilan birga, kansler Germaniya “zarur bo‘lguncha” Ukrainani qo‘llab-quvvatlashda davom etishiga ishontirdi.