Livan BMT Xavfsizlik Kengashiga shikoyat qildi

Livan 2 oktyabrdan 11 noyabrgacha Isroilning Livanga uyushtirgan hujumlari yuzasidan Birlashgan Millatlar Tashkiloti Xavfsizlik Kengashiga shikoyat bilan murojaat qildi. Bu haqda Livan Tashqi ishlar vazirligi bayonot berdi.

Bayonotda qayd etilishicha, bu Livanning Isroil hujumlarining ta’sirini hujjatlashtirish hamda xalqaro hamjamiyat va BMT Xavfsizlik Kengashiga mas’uliyatni o‘z zimmasiga olishi va hujumlarni to‘xtatish uchun chora ko‘rishni eslatish uchun BMT Xavfsizlik Kengashiga davriy shikoyatlarining bir qismidir.

Shikoyatda Isroilning qirg‘oq bo‘yidagi Batroun shahrida livanlik Imad Ehmezning o‘g‘irlab ketilishi, quruqlikdagi hujumlarning davom etishi va Yarun, Aytarun, Marun ar-Ras, Mays al-Jabal va boshqa shu kabi qishloq va mahallalarning butunlay vayron qilinishi haqida so‘z boradi. Shuningdek, Isroilning Livan armiyasi, fuqarolik nishonlari va tinch aholiga hujum qilishda davom etgani ta’kidlanadi.

Bundan tashqari, hujjatda Isroilning Baalbek va Nabatiyadagi tarixiy binolarni nishonga olgani qayd etilgan. Shikoyatda, shuningdek, Sayda mintaqasidagi Adlun va Sur mintaqasidagi Dayr Qonun al-Ner, Ras al-Ayn va Ayn Baal shaharlarida tez yordam mashinalari, favqulodda vaziyatlar markazlari va xodimlariga zarba berilgani keltirilgan.

Ma’lumot uchun, Isroil 23 sentyabr kuni Livanda "Shimol o‘qlari" deb nomlangan harbiy operatsiyani boshlagan edi. Operatsiya davomida “Hizbulloh” yetakchisi Hasan Nasrulloh va harakatning boshqa yuqori lavozimdagi vakillari o‘ldirildi. 1 oktyabr kuni Isroil Livanda quruqlikdagi operatsiya boshlanganini e’lon qildi va keyinchalik bu operatsiya bir necha bor kengaytirildi.