Merkel Ukrainada urushdan chiqishning yo‘llari haqida ma’lum qildi

Germaniya sobiq kansleri Angela Merkelning fikricha, Ukrainadagi urushdan chiqish yo‘li faqat jang maydonida bo‘lmaydi. Memuarlari nashr etilishi munosabati bilan Germaniya vazirlar mahkamasining sobiq rahbari 23 noyabr, shanba kuni chop etilgan Britaniyaning The Times gazetasiga intervyu berdi.

Merkelning so‘zlariga ko‘ra, u Germaniya hukumati va Yevropa Ittifoqining urushni tugatish va Kiyev suverenitetini saqlab qolish uchun qilayotgan ishlarini qo‘llab-quvvatlaydi. «Ammo men ishonamanki, ma’lum bir nuqtada va bugungi kunni mas’ul odamlar belgilashi kerak, bizga suhbatlar kerak bo‘ladi», dedi u. «Bu faqat harbiy yo‘l bilan hal bo‘lmaydi», — deya ta’kidladi Merkel.

GFR sobiq kansleri Zelenskiy haqida: Uni hurmat qilaman

Unga Ukraina prezidenti Volodimir Zelenskiy yoqadimi, degan savolga sobiq kansler faqat do‘stlar haqida bunday ohangda savol berish o‘rinli, deb javob berdi.

«Men uni (Rossiya prezidenti Vladimir) Putinning Ukrainaga hujumidan keyin qilgan ishlari va erishgan yutuqlari uchun juda hurmat qilaman, chunki hujumdan keyingi dastlabki bir necha soat ichida ko‘pchilik qochib, mamlakatni tashlab ketgan bo‘lardi. Lekin u bunday qilmadi», dedi vazirlar mahkamasining sobiq rahbari. «Menimcha, bu Ukrainaga umid va bu urushdan, bu dahshatli urushdan mustaqil davlat sifatida chiqish imkoniyatini bergan eng muhim qadam edi», deb qo‘shimcha qildi u.

Merkel: Menda hech qachon Putin bo‘yicha illyuziyalar bo‘lmagan

Germaniya sobiq kansleri Angela Merkel Rossiya prezidenti Vladimir Putin 2000 yilda birinchi marta prezidentlikka kelganida Ukrainaga hujum qilish rejasiga ega bo‘lmaganini aytdi. Katta ehtimol bilan, u hokimiyatda bo‘lgan vaqtida bunday fikrga kelgan va G‘arb Rossiya bilan munosabatlarda «hammasini to‘g‘ri qildimi» yoki yo‘qmi, shu haqda savol berishi kerak, dedi u 22 noyabr kuni nashr etilgan Der Spiegel haftaligiga bergan intervyusida.

«Men bu savolga aniq javob bera olmayman. Ochig‘ini aytsam: Putinning Ukrainaga hujumini oqlaydigan biron bir sabab yo‘q. Ammo G‘arbda birdamlik bo‘lsa yaxshi bo‘lardi. Biz kutilganidek kuchli bo‘lolmadik», — dedi u.

Merkelning aytishicha, u Putin haqida «hech qachon illyuziyalarga ega bo‘lmagan». «U har doim diktatorlik tendensiyalariga ega edi, men ko‘pincha uning xotirjamligidan g‘azablanardim», dedi sobiq kansler.