ОАВ: Трампнинг Украина бўйича режаси баъзи шартлари эълон қилинди

АҚШ президенти Доналд Трампнинг Украинадаги можарони ҳал қилиш режасида ўт очиш тўхтатилганидан сўнг, Европа қўшинларини мамлакатга жойлаштириш назарда тутилган. Бу ҳақда Америка маъмуриятининг юқори мартабали вакилига таяниб, The New York Post (NYP) хабар берди.

21 апрель куни Трамп Россия ва Украина билан музокаралар тафсилотларини яқин уч кун ичида тақдим этишини айтган эди. NYP хабарига кўра, Трамп режасида ўт очишни тўхтатиш бўйича келишувга эришилса, Украинага Европа қўшинларини киритиш ҳам бўлиши мумкин.

«Қийинчилик шундаки, хавфсизлик кучлари қандай жойлаштирилади - биз буни «қаршилик кучлари» деймиз. Бу украиналиклар талаб қилаётган хавфсизлик кафолатларининг бир қисми ва биз уларни қабул қилишига умидвормиз», деди манба нашрга.

Шунингдек, ўт очишни тўхтатиш режимини назорат қилувчи алоҳида тинчликпарвар кучларини ҳам жойлаштириш назарда тутиляпти. Улар «руслар, украиналиклар ва НАТО аъзоси бўлмаган учинчи давлат» вакилларидан иборат «қўшма комиссия»га ўхшаш бўлади. Охирги томон, деб ёзди нашр, ҳар икки томон қуролларини ташлаганини таъминлаш учун олдинги чизиқни кузатиши керак бўлади.

NYP манбаси Қўшма Штатлар миссияда иштирок этиши мумкинлигини тан олди, аммо «қуруқликдаги ҳарбий куч» сифатида эмас. Вашингтон, унинг сўзларига кўра, «учинчи томон билан бирга молиявий куч» сифатида қатнашиши мумкин.

Урушни ҳал қилиш бўйича келишув шартлари ҳозирча якунига етмаган, чунки Россия ва Украина режани алоҳида муҳокама қилмоқда, деб ёзди NYP. Трампнинг айтишича, агар Россия ёки Украина келишувга эришиш жараёнини мураккаблаштирса, АҚШ тинчлик музокараларидан бош тортиши мумкин. Шу билан бирга, у Вашингтонда «бу муаммони ҳал қилиш учун яхши имконият бор» деб ҳисобламоқда.

17 апрель куни Парижда АҚШ, Украина ва Европа вакилларининг учрашувлари бўлиб ўтди, унда Америка делегацияси «Украина бўйича мустаҳкам тинчлик схемаларини» тақдим этди. Бу таклифлар Россия томонига юборилган.

Bloomberg маълумотларига кўра, АҚШ Россия босиб олган ҳудудларни Россия назорати остида қолдиришни, шунингдек, Украинанинг НАТО аъзоси бўлишини кун тартибидан олиб ташлашни таклиф қилган. The Wall Street Journal Америка томони таклифлари рўйхатида Қримнинг Россия деб расман тан олинишига оид бандлар ҳам борлигини ёзди.

NYP манбаси сўзларига кўра, Украина томони «де-факто ҳудудларнинг 20 фоизидан воз кечишга тайёр, лекин де-юре эмас. Де-юре биз [Россия] бу ерларни тортиб олганини тан олишимизни англатади ва шунда биз бу ҳудудларни бошқа ҳеч қачон кўрмаймиз», деди расмий.