Путин Украина билан тўғридан-тўғри музокаралар ўтказишга рухсат берди

Владимир Путин Киевнинг фуқаролик инфратузилмасига ҳужумларни тўхтатиш таклифини ўрганиб чиқишини айтди ҳамда Россия ва Украина ўртасида тўғридан-тўғри музокаралар ўтказилиши мумкинлигини истисно этмади. 

“Буни тушуниб олиш керак, бу масалаларни чуқур ўрганиш лозим, эҳтимол, икки томонлама тарзда ҳам,” — деди Путин душанба куни, 21 апрель куни журналистларга.

Бунга қадар Украина президенти Владимир Зеленский Кремлга 30 кун муддатга, кейинчалик узайтирилиши мумкин бўлган, узоқ масофали дронлар ва ракеталар ёрдамида фуқаролик инфратузилмасига зарба беришдан бутунлай воз кечишни таклиф қилган эди.

Путин Сума шаҳрида фуқаролик объектига зарба берилганини тан олди. Бироқ, Россия президенти Киевни фуқаролик объектларидан ҳарбий мақсадларда фойдаланаётганликда айблади ва 13 апрель куни Россия Қуролли Кучлари томонидан Сумск вилоятига берилган зарбани эсга олди. 

“Масалан, ҳаммага яхши маълум бўлган ҳолат: бизнинг Қуролли Кучларимиз Сумск вилоятидаги, назаримда, конгресс марказига зарба берди. Бу фуқаролик объектими? Ҳа, фуқаролик. Лекин у ерда Курск вилоятида жиноят содир этганлар тақдирланаётган эди,” — дея Путиндан иқтибос келтиради «Интерфакс» агентлиги.

35 кишининг, жумладан болаларнинг ҳаётига зомин бўлган ракета зарбасини Россия президенти “лойиқ жазолаш” деб атади. “Бу айнан уларни жазолаш учун қилинган,” — дея таъкидлади у.

14 апрель куни, зарбадан бир кун ўтиб, Сумск вилояти ҳарбий маъмурияти раҳбари Владимир Артюх Сума шаҳрида Украина Қуролли Кучларининг 117-бригадаси ҳарбийларини тақдирлаш режалаштирилганини тасдиқлади. Эртаси куни эса Зеленский фармони билан Артюх лавозимидан озод этилди.