Tramp Putin bilan uchrashuv haqida: Yakuniy qaror qabul qilinmadi

AQSh prezidenti Donald Tramp Rossiya prezidenti Vladimir Putin bilan Vengriyada o‘tkazilishi rejalashtirilgan sammiti nega qoldirilgani sababini tushuntirdi. Yevropa vaqti bilan 22-oktabr, chorshanbaga o‘tar kechasi Oq uyning Oval kabinetida bo‘lib o‘tgan uchrashuv chog‘ida jurnalistning savoliga Tramp “Men foydasiz uchrashuvni xohlamayman”, deb javob berdi. "Men vaqtni behuda o'tkazmoqchi emasman, shuning uchun nima bo'lishini ko'ramiz", deya qo'shimcha qildi u.

Amerika prezidentining soʻzlariga koʻra, yaqin ikki kun ichida Kreml rahbari bilan uchrashuv boʻyicha qaror qabul qilinadi.

16-oktabr kuni Putin bilan telefon orqali suhbatdan so‘ng Tramp AQSh Davlat kotibi Marko Rubio boshchiligidagi Rossiya va AQSh delegatsiyalari o‘rtasidagi muzokaralar kelasi haftada (20-26 oktabr) bo‘lib o‘tishini ma’lum qildi. AQSh prezidenti shundan so‘ng Vengriya poytaxtida Rossiya prezidenti bilan shaxsan uchrashishini ma’lum qildi.

OAV: Tramp-Putin uchrashuviga tayyorgarlik toʻxtatildi

Bir necha soat avval bir qancha jurnalistlar va ommaviy axborot vositalari Oq uyning anonim mulozimiga tayanib, AQSh va Rossiya prezidentlarining Budapeshtdagi uchrashuvi yaqin kelajakda bo‘lib o‘tmasligini xabar qilgan edi; AQSh rasmiylari bunga tayyorgarlikni bekor qildi.

Xususan, NBC telekanali muxbiri Garret Xake ijtimoiy tarmoqda “Budapeshtda Tramp-Putin sammitiga tayyorgarlik hozirda to‘xtatilgan”, deb yozdi. Oq uyning anonim yuqori martabali mulozimining aytishicha, Tramp tomonlarni muzokaralarga yetarlicha tayyor emas deb hisoblaydi.

Keyinroq Reuters va AFP ham Oq uyning anonim yuqori martabali mulozimiga tayanib, hozircha Tramp va Putin o‘rtasida “yaqin kelajakda” uchrashuv o‘tkazish rejasi yo‘qligini xabar qilishdi. Ularning manbasining qo‘shimcha qilishicha, AQSh Davlat kotibi Marko Rubio va Rossiya tashqi ishlar vaziri Sergey Lavrov ham shaxsiy uchrashuvni rejalashtirmayapti.