Vashingtonda Trampning inauguratsiyasi oldidan minglab odamlar norozilik namoyishi o‘tkazdi

18 yanvar kuni minglab namoyishchilar, asosan ayollar, 20 yanvar kuni inauguratsiya qilinadigan AQSHning saylangan prezidenti Donald Trampga qarshi norozilik bildirish uchun Vashington ko‘chalariga chiqdi. Bu haqda BBC xabar berdi. 

“Xalq marshi”– ilgari “Ayollar marshi” nomi bilan atalgan – 2017 yildan beri har yili o‘tkaziladi.

Bir nechta faol guruhlar “Trampizmga qarshi turish” harakatini uyushtirgan. Trampga qarshi kichik norozilik namoyishlari Nyu-York va Sietlda ham bo‘lib o‘tdi.

Mitinglar Trampning prezidentlik qasamyodini qabul qilish marosimi oldidagi tadbirlar uchun mamlakat poytaxtiga kelishi bilan bir vaqtga to‘g‘ri keldi.

Vashingtonda o‘tkazilgan “Xalq marshi” avvalgi shunga o‘xshash tadbirlarga qaraganda kamroq odamni jalb qildi.

Tashkilotchilar 50 ming kishi qatnashishini kutgan. Ammo kelganlar soni 5000 ga yaqinni tashkil qilgan.

Namoyishchilar uchta bog‘da to‘planib, so‘ng Linkoln yodgorligi oldiga chiqdi.

Tashkilotchilarning taʼkidlashicha, ularning maqsadi “avtokratiklarga qarshi kurashning o‘tmishdagi muvaffaqiyatlari va samarali strategiyalariga asoslanib” Trampga qarshi turishdir.

“Xalq marshi” birinchi marta Tramp 2016 yilda Demokratik partiyadan prezidentlikka nomzod Hillari Klintonni mag‘lub etganidan keyin bo‘lib o‘tdi. Ayollar Trampning birinchi inauguratsiyasining ertasigayoq norozilik chaqirdi va yuz minglab odamlar bu chaqiruvga javob berdi.

Ayollar marshi keyingi yillarda “Trampning kun tartibiga qarshilik” deb ataladigan asosiy qism bo‘lib qoldi. Ammo keyingi yurishlarning hech biri bu qadar keng ko‘lamli emas edi.