Xitoyda chikungunya virusi bilan kasallanganlar soni 7000 dan oshdi — OAV
Mamlakatning Guandun provinsiyasida iyuldan buyon chikungunya virusiga chalinish bilan bog‘liq 7000 dan ortiq holat aniqlandi. Mahalliy maʼmuriyat vakillari hududda karantin choralarni ko‘rmoqda.
Chikungunya virusi chivinlar orqali tarqaladi. U isitma hamda bo‘g‘imlarda kuchli og‘riq keltirib chiqardi, alomatlar baʼzan yillar davomida yo‘qolmasligi mumkin. Ushbu virus odamdan odamga yuqmaydi – uning tashuvchisi faqat chivinlar hisoblanadi. Yaʼni, virusga chalinish uchun uni yuqtirib olgan odamni chaqqan chivin chaqishi kerak bo‘ladi.
Xitoy rasmiylariga ko‘ra, hozircha chikungunyaga chalingan bemorlarning barchasida yengil shakldagi simptomlar kuzatilmoqda va bemorlarning 95 foiziga bir hafta ichida javob berib yuborilmoqda. Chikungunya epidemiyalari Janubiy va Janubi-Sharqiy Osiyoda, shuningdek, Afrikada tez-tez uchraydi, ammo Xitoyda bungacha bu qadar keng tarqalmagan edi.
O‘zbekiston Sanitariya-epidemiologiya qo‘mitasining maʼlum qilishicha, Xitoyda avj olgan chikungunya bezgagi O‘zbekistonda tarqalmaydi. Qo‘mitaga ko‘ra, ushbu kasallikni tarqatuvchi chivinlar O‘zbekiston tabiatida uchramaydi.
.png "YouTube UZREPORT TV")
