Yevroparlament Venesuela prezidentini hibsga olishni talab qiluvchi rezolyutsiyani ma’qulladi

Yevropa parlamenti Venesuelada bo‘lib o‘tgan prezidentlik saylovlariga bag‘ishlangan rezolyutsiyani qo‘llab-quvvatladi, uning g‘olibi mahalliy saylov komissiyasi tomonidan Nikolas Maduro deb topildi. Hujjat uni hibsga olishni talab qilmoqda.

Rezolyutsiyani 309 deputat qo‘llab-quvvatladi, 201 nafari qarshi chiqdi, yana 12 nafari betaraf qoldi. YP muxolifat yetakchisi Edmundo Gonsalesni Venesuelaning qonuniy saylangan prezidenti sifatida tan oldi. Hujjat Yevropa Ittifoqi rahbariyati va unga a’zo davlatlarni Gonsales 2025-yil 10-yanvarda (inauguratsiya rejalashtirilganda) lavozimga kirishishi uchun barcha imkoniyatlarni ishga solishga chaqirmoqda.

“Yevropa parlamenti aʼzolari... mintaqaviy oʻyinchilar va xalqaro hamjamiyatni Maduro rejimi va uning yaqin doiralariga maksimal bosim oʻtkazishga chaqiradi, toki ular Edmundo Gonsalesni qonuniy va demokratik yoʻl bilan prezident etib saylangan deb tan olish orqali Venesuela xalqining demokratik irodasini qabul qiladilar”, - deyiladi qarorda.

Edmundo Gonsales o'z vatanida hibsga olinayotgani uchun sentyabr oyi boshida qochib ketgan Ispaniyadan Yevroparlamentga minnatdorchilik bildirdi. 

“Biz venesuelaliklar yevropaliklar erishgan narsaga erishmoqchimiz: erkinlik va demokratiyada yashash. Saylangan prezident sifatida Yevroparlamentga bunday e’tirof uchun minnatdorchilik bildiraman”, — deb yozdi muxolifatchi X ijtimoiy tarmog‘ida.

Venesuelada saylovlar 28 iyul kuni bo‘lib o‘tdi. Mamlakat Milliy saylov kengashi ma’lumotlariga ko‘ra, 2013-yildan buyon prezident lavozimida ishlab kelayotgan Nikolas Maduro 51,2 foiz ovoz bilan, Edmundo Gonsales esa 44 foiz ovoz bilan g‘alaba qozongan. Muxolifat, exit-poll natijalariga tayanib, 73% ovoz bilan janob Gonsalesning g'alabasini e'lon qildi. Butun mamlakat bo'ylab ommaviy norozilik namoyishlari bo'lib o'tdi.