Zelenskiy: Rossiya urushni davom ettirish uchun vaqtni cho‘zmoqchi

Rossiya Qo‘shma Shtatlar bilan muzokaralar orqali vaqtni cho‘zishga harakat qilmoqda, dedi Vladimir Zelenskiy. «Asosiysi, tinchlikka erishish yo‘lidagi diplomatik saʼy-harakatlar muvofiqlashtirilgan va real natijalarga qaratilgan. Ko‘rinib turibdiki, Rossiya urush va ishg‘olni davom ettirish uchun vaqtni cho‘zishga urinmoqda», deb yozdi Ukraina prezidenti X ijtimoiy tarmog‘ida finlyandiyalik hamkasbi Aleksandr Stubb bilan 20 may, seshanba kuni suhbatdan so‘ng. Uning so‘zlariga ko‘ra, hozirda hamkorlari bilan Rossiya xatti-harakatlarini o‘zgartirish ustida ishlamoqda. «Sanksiyalar muhim va men ularni urush uchun masʼul bo‘lganlar uchun aniqroq qilib qo‘ygan har bir kishidan minnatdorman», deb taʼkidladi Vladimir Zelenskiy.

Uning taʼkidlashicha, Rossiya va Ukraina o‘rtasidagi urush «aniq va real takliflar» zarur bo‘lgan muzokaralar stolida yakunlanishi kerak. «Ukraina har qanday samarali muzokara formatiga tayyor. Va agar Rossiya noreal shartlarni qo‘yishda va mumkin bo‘lgan natijalarga putur yetkazishda davom etsa, bu og‘ir oqibatlarga olib kelishi kerak», — dedi Ukraina rahbari.

Bir kun avval AQSH va Rossiya prezidentlari Donald Tramp va Vladimir Putin o‘rtasidagi telefon suhbatlaridan so‘ng Zelenskiy Ukraina Qurolli kuchlarini Ukraina hududlaridan olib chiqib ketish ehtimolini rad etdi. «Agar Rossiya qo‘shinlarimizni yerimizdan olib chiqish uchun shart qo‘ysa, bu ular urush tugashini istamayapti, degani. Chunki ular Ukraina buni qilmasligini aniq tushunishadi», — dedi u.

Ukraina prezidentining so‘zlariga ko‘ra, Putin bilan suhbatdan so‘ng Tramp Zelenskiyga qo‘ng‘iroq qilib, suhbat mazmuni haqida maʼlum qilgan. Oq uy rahbari uchun eng muhimi, Kiyev va Moskva bevosita muzokaralarni boshlashi. Shu bilan birga, Vladimir Zelenskiyning o‘zi urushni tugatish yo‘lidagi birinchi qadam sifatida o‘t ochishni to‘xtatishni ko‘rishni xohlaydi, chunki bu bilan rossiyaliklar tinch yo‘l bilan kelishuvga chinakam tayyorligini namoyish etishlari mumkin.