UZREPORT TV ва FUTBOL TV телеканалларида Европа майдонларидаги энг муҳим учрашувларни томоша қилинг

«UZREPORT» ахборот агентлиги («UZREPORT TV» ва «FUTBOL TV» телеканаллари) Чемпионлар лигаси, Европа лигаси, Англия Премьер-лигаси ва Испания чемпионати (Ла Лига) учрашувларини янги 2018/19 йилги мавсум учун Ўзбекистон ҳудудида трансляция қилиш ҳуқуқини қўлга киритганини эълон қилади. Трансляция ҳуқуқи экслюзив тарзда ва барча ҳуқуқлар асосида (all rights), яъни, телевидение, интернет, мобил алоқа ва бошқа ҳуқуқлари билан қўлга киритилган.

УЕФА Чемпионлар Лигаси

Европа қитъасида клублар ўртасидаги асосий мусобақанинг гуруҳ босқичи 18 сентябр санасида бошланади. Финал учрашуви эса келаси йили 1 июнь куни “Атлетико Мадрид” клуби стадиони ҳисобланмиш – “Ванда Метрополитано”да бўлиб ўтади.

Сўнги 3 йилда кетма-кет асосий совринни қўлга киритаётган Мадриднинг “Реал” клуби бу йил ҳам мусобақанинг амалдаги ғолиби сифатида иштирок этади. Ушбу мавсум “қаймоқранглилар” сафида катта ўзгаришлар рўй берди: Чемпионлар лигасида жамоанинг тимсолига айланиб улгурган Криштиану Роналду “Реал”ни тарк этди. Португалиялик футболчи мусобақа тўпурарлари орасидаги натижасини эндиликда Туриннинг “Ювентус” клубида яхшилашга ҳаракат қилади.

Турнирда кетма-кет 4 марта ғалаба қозониш қийин бўлиши аниқ. Сабаби, Европанинг номдор жамоалари, хусусан Англия Премьер-лигаси клублари ўз таркибларини сезиларли даражада кучайтира олишди. Франция, Гремания ва Италия чемпионларини бу борада алоҳида таъкидлаш керак. “ПСЖ”да Неймар ва Мбаппе, “Бавария”да Хамес ва Левандовски, “Ювентус”да Роналду ва Дибала, “Барселона”да Месси ва Суарес “Реал”га катта қийинчиликлар туғдриши мумкин.

УЕФА Европа Лигаси

Европа Лигасининг гуруҳ босқичи бу мавсум 20 сентябр санасидан старт олади. Бу мавсум мусобақа тарихида 48 ҳисобланади. Турнир финали 2019 йилнинг 29 май санасида Боку шаҳридаги «Олимпия» стадионида бўлиб ўтади.

Мусобақанинг ўтган мавсумдаги ғолиби “Атлетико” янги мавсумни Чемпионлар лигасида бошлайди.

Бу йил Европа лигасида Лондонинг икки номдор жамоаси “Челси” ва “Арсенал” ҳам иштирок этишади ва испания клублари гегемонлигига барҳам беришга уриниб кўришади.

Англия Премьер-лигаси

1992 йил туманли альбионда старт олган Премьер-лиганинг 27 мавсуми 11 августда бошланиб 19 май санасида ўз якунига етади.

"Манчестер Сити" клуби чемпионликни ҳимоя қилишга уриниб кўради.

Эслатиб ўтамиз, АПЛни ўтган мавсум якунига етгач "Суонси", "Сток Сити" ва "Вест Бромвич Альбион" клублари тарк этишди. Уларнинг ўрнини эса Чемпионшип ғолиби ва иккинчи ўрин соҳиби " Вулверхэмптон Уондерерс" ва " Кардифф Сити" ҳамда ўтиш ўйинида зафар қучган "Фулхэм" клублари эгаллашади.

Янги мавсум юқори ҳароратда ўтиши кутилмоқда. Бу йил чемпионлик учун ўз таркибини юлдузлар билан кучатирган "Манчестер Сити", "Манчестер Юнайтед", "Ливерпуль", "Тоттенхэм", "Челси" ва "Арсенал" каби жамоалари баҳс олиб бориши кутилмоқда. Мусобақанинг энг қизғин ўйинлари ва тур шарҳларини сиз UZREPORT TV ва FUTBOL TV телеканалларида томоша қилиб боришингиз мумкин бўлади.

Испания Чемпионати (Ла Лига)

Примеранинг 88 мавсуми Англия чемпионатидан бир ҳафта ўтиб, яъни 18 августдан бошланади ва 26 май санасида ўз якунига етади.

Амалдаги чемпион Каталониянинг "Барселона" клуби ҳисобланади.

Ўтган мавумдан сўнг "Депортиво", "Лас-Пальмас" ва "Малага" клублари сегундага тушиб кетишган бўлса, Мадриднинг "Райо Вальекано" ва плей-офф ўйинлари ғолиби "Вальядолид" яна Ла Лигага қайтишга муваффақ бўлишди. Шунингдек, ўз тарихида илк бор "Уэска" клуби ҳам юқори дивизионда иштирок этади.

Бу йил ҳам чемпионлик учун "Барселона", "Реал" ва "Атлетико" клублари баҳс олиб бориши кутилмоқда. "Валенсия", "Севилья" ва "Вильярреал" клубларининг ҳам имкониятлари юқори баҳоланмоқда.

Албатта, каталонияликларнинг чемпионлик учун асосий рақобатчиси "Реал" клуби бўлади. Лекин жамоанинг янги мураббийи Хулен Лопеттеги бу мавсум Криштиану Роналду ҳизматидан фойдалана олмайди.

Шу сабабли ҳам, бу йил Ла Лигада кураш қай йўсинда кечиши кўпчиликка қизиқ туюлмоқда. Сиз эса воқеалар ривожини бизнинг телеканалларда томоша қилишингиз мумкин.

Эслатиб ўтамиз, бир кун аввал "UZREPORT" ахборот агентлиги Италия чемпионати (А Серия) ва УЕФА Миллатлар лигаси учрашувларини экслюзив трансляция қилиш ҳуқуқини қўлга киритганини маълум қилган эди.

Сюрпризлар мавсуми давом этади!