Сенати раиси Танзила Нарбаева Лондонда ЕТТБ президенти билан учрашди

Олий Мажлис Сенати раиси Танзила Нарбаева Лондонга амалий ташрифи доирасида Европа тикланиш ва тараққиёт банки президенти Одил Рено–Бассо билан учрашув ўтказди.

Ўтган йили май ойида  Самарқанд шаҳрида Европа тикланиш ва тараққиёт банки Бошқарувчилар кенгашининг 32 йиллик йиғилиши муваффақиятли ўтказилгани, тадбир кенг муҳокамалар ўтказиш ва жаҳон иқтисодиётини барқарор ривожлантириш бўйича тавсиялар ишлаб чиқиш учун муҳим майдонга айлангани мамнуният билан қайд этилди.

Таъкидлаш жоиз, ўтган 6 йил давомида Ўзбекистон ва ЕТТБ ўртасидаги ҳамкорлик сифат жиҳатидан янги босқичга кўтарилди. Бугунги кунда Банкнинг мамлакатимиздаги лойиҳалар портфели 4 миллиард евродан ошмоқда. ЕТТБ молиявий кўмагида аҳоли фаровонлигини ошириш ва янги иш ўринлари яратиш бўйича муҳим лойиҳалар амалга ошириляпти.

Ўзбекистон банкнинг бешта асосий ҳамкори қаторидан жой олди, йиллик инвестициялар ҳажми бўйича мамлакатимиз ЕТТБнинг Марказий Осиёдаги энг йирик бизнес шеригига айланди.

Учрашувда Ўзбекистон билан ЕТТБ ўртасида амалга ошириладиган қўшма ташаббусларнинг йўналишлари муҳокама қилинди.

Хусусан, банкнинг Ўзбекистонга оид стратегияси доирасида ёшларни илмий фаолиятга кенг жалб қилиш, инновацияларни, бизнес ва тадбиркорликни ривожлантиришга кўмаклашишга алоҳида эътибор қаратган ҳолда уларни қўллаб-қувватлаш дастурини ишлаб чиқиш таклифи билдирилди.

Шунингдек, гендер тенглиги масалалари давлат сиёсатининг устувор йўналиши эканлигидан келиб чиқиб, ЕТТБ билан биргаликда қишлоқ аёлларини касб-ҳунарга ўргатиш, тадбиркорлик кўникмаларини шакллантириш бўйича ҳамкорлик истиқболлари кўриб чиқилди.

О. Рено–Бассо ЕТТБнинг куни кеча тасдиқланган 2024-2029 йилларга мўлжалланган мамлакатимизга оид стратегияси Ўзбекистон 2030 стратегиясига тўлиқ мос келиши, унда Президент Шавкат Мирзиёев томонидан белгилаб берилган иқтисодиётни яшиллаштириш, инклюзивлик ва гендер тенглиги ва рақамлаштириш каби устувор йўналишлар акс этганини алоҳида таъкидлади. 

Учрашувда Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси ҳамда Европа тикланиш ва тараққиёт банки ўртасида Ўзаро англашув меморандуми имзоланди.

Меморандум аёлларнинг меҳнат бозорида имкониятларини кенгайтириш, бандлик соҳасида гендер мувозанатига эришиш, кредит ресурсларидан фойдаланиш имкониятларини ошириш ва молиявий мустақилликни оширишни таъминлашни назарда тутади.