Xorijdagi mahkum fuqarolar jazoni O‘zbekistonda davom ettirishi mumkinligi belgilanmoqda

Xorijiy davlatlarda jinoyat sodir etib, ozodlikdan mahrum etish jazosiga tortilgan va jazoni o‘tayotgan fuqarolarimiz qolgan jazo muddatini O‘zbekistonda davom ettirishi mumkinligi qonunchiligimizda belgilab qo‘yilmoqda.

Shuningdek, xorijiy davlat hududida aqli norasolik holatida ijtimoiy xavfli qilmish sodir etgan yoki ushbu qilmishni sodir etganidan keyin ruhiy kasallikka duchor bo‘lgan shaxsga xorijiy davlat sudining unga nisbatan tibbiy yo‘sindagi majburiy choralarni qo‘llash to‘g‘risidagi qarori bo‘lsa, majburiy davolashni O‘zbekistonda amalga oshirish uchun qabul qilish mumkinligi belgilanmoqda.  

Ushbu yangiliklar Oliy Majlis Qonunchilik palatasining majlisida ko‘rib chiqilgan "O‘zbekiston Respublikasining Jinoyat-protsessual kodeksiga qo‘shimchalar va o‘zgartirish kiritish to‘g‘risida"gi qonun loyihasida o‘z aksini topgan.  

Majlisda O‘zbekiston Respublikasi Bosh prokurori o‘rinbosari S.Ortiqova loyiha haqida maʼlumot berar ekan, O‘zbekiston Respublikasi fuqarolarining huquqlarini xorijiy davlatlarda yana-da kafolatli taʼminlash maqsadida muayyan ishlar amalga oshirilayotgani, qator davlatlar bilan mahkumlarning jazo o‘tashini davom ettirish uchun o‘tkazish bo‘yicha xalqaro shartnomalar imzolanganini taʼkidladi:  

– Biroq bugungi kunda O‘zbekiston Respublikasi Jinoyat-protsessual kodeksida xorijiy davlatlar sudlarining qarorlarini tan olish va ijro etish, mahkumlarni topshirish va qabul qilish asoslari, sud jarayoni ishtirokchilarining protsessual maqomi hamda jazo belgilashni tartibga soluvchi qoidalar nazarda tutilmagan. Qonun loyihasi bilan Jinoyat-protsessual kodeksi xorijiy davlat sudining qarorini tan olish va ijroga qaratish, ozodlikdan mahrum etilgan shaxsni jazoni o‘tashni, tibbiy yo‘sindagi majburlov choralari qo‘llanilgan shaxsni majburiy davolashni davom ettirish uchun qabul qilish va xorijiy davlatga berish to‘g‘risidagi alohida bob bilan to‘ldirilmoqda. Qonun loyihasining qabul qilinishi xorijdagi fuqarolarning konstitutsiyaviy huquq va erkinliklarini yana-da samarali himoya qilishga, ularning qonuniy huquq va manfaatlariga ziyon yetkazilishining oldini olishga xizmat qiladi, – dedi S.Ortiqova.

Majlisda qonun loyihasining muhimligi qayd etilib, deputatlar tomonidan qabul qilindi.