2024-yilda Oʻzbekiston-Britaniya universitetlari forumi oʻtkaziladi

20-noyabr kuni Oliy taʼlim, fan va innovatsiyalar vazirligida vazirning birinchi oʻrinbosari Komiljon Karimov va Vestminster universiteti (London) prezidenti Piter Bonfild oʻrtasida uchrashuv boʻlib oʻtdi.

Muloqot davomida tomonlar Toshkentdagi xalqaro Vestminster universitetining faoliyati va uni yanada takomillashtirish masalalarini muhokama qildilar. Respublika oliy taʼlim tizimida Buyuk Britaniyaning ilgʻor tajribasi qoʻllanilishini yanada kengaytirish jarayonida Vestminster universitetining ishtiroki yuzasidan fikr almashildi.  

Piter Bonfild kuni kecha boʻlib oʻtgan Toshkentdagi xalqaro Vestminster universitetining bitiruvchilariga diplomlar topshirish marosimidan olgan iliq taassurotlari bilan boʻlishdi. “Bitiruvchilarimiz Vestminster universiteti diplomi bilan mamlakatdagi yirik kompaniya va tashkilotlarda faoliyat yuritmoqdalar, mustaqil tarzda oʻz biznesini yoʻlga qoʻymoqdalar. Albatta, biz taʼlim bergan bitiruvchilar mehnat bozorida oʻzining munosib oʻrnini topishi biz uchun muhimdir,” – deya taʼkidlab oʻtdi Bonfild. 

Maʼlumot uchun, 2022/2023-oʻquv yilida Toshkentdagi xalqaro Vestminster universitetini jami 1200 nafar talaba bitirib, Buyuk Britaniyaning Vestminster universiteti diplomini qoʻlga kiritdi.   

Shuningdek, muzokarada Vestminster universiteti bilan istiqbolli hamkorlik yoʻnalishlari qatorida Oʻzbekiston universitetlari reytinglarini yanada yaxshilashda ekspertlik maslahatlarini berish, respublika universitetlarining ingliz oliy taʼlim muassasalari bilan yanada yaqinlashuvida koʻmaklashish taklif etildi. 

Suhbat yakunida joriy yil 2–3-mart kunlari Toshkentdagi xalqaro Vestminster universitetida boʻlib oʻtgan Oʻzbekiston-Britaniya universitetlari forumining samarali natijasini eʼtirof etgan holda, uni 2024-yilda ham tashkil etishga kelishildi. 

Maʼlumot oʻrnida, Vestminster universiteti Buyuk Britaniya Taʼlim vazirligi tomonidan yuritiladigan “Teaching Excellence Framework – TEF” universitetlarda oʻqitish sifatini baholash tizimida joriy yilda “kumush” darajasida, yaʼni juda yuqori sifatli deb baholangan.