Qarshida vaqtincha saqlash hibsxona faoliyati to‘xtatildi, 1 nafar xodim lavozimidan ozod etildi va 9 nafariga intizomiy chora ko‘rildi

Oliy Majlisning Inson huquqlari bo‘yicha vakili (ombudsman) hamda uning huzuridagi jamoatchilik guruhlari tomonidan 2024 yilda Qashqadaryo viloyatida joylashgan vaqtincha saqlash va tergov hibsxonalari, jazoni ijro etish muassasalari hamda maxsus qabulxonalarga monitoring tashriflari amalga oshirilgan bo‘lib, unda bir qator kamchiliklar aniqlangan edi. Xususan, Qarshi shahar Ichki ishlar organlari faoliyatini muvofiqlashtiruvchi boshqarmasi, Qarshi va Koson tumanlari ichki ishlar bo‘limlarining vaqtincha saqlash hibsxonalarida shaxslarni saqlash sharoitlari belgilangan meʼyoriy talablarga javob bermasligi kuzatilgandi. Kameralarning taʼmirtalab holatga kelib qolganligi, shu bilan birga tabiiy va sunʼiy yorug‘lik tizimi, sanitariya-gigiyena holati, havo almashtirish tizimi talab darajasida emasligi kabi qator kamchiliklar qayd etildi.

Ushbu kamchiliklarni bartaraf etish bo‘yicha Ombudsman tomonidan Ichki ishlar vazirligiga taqdimnoma kiritildi. Maʼlum qilinishicha, taqdimnoma asosida ayrim kamchiliklarni bartaraf etish bo‘yicha amaliy ishlar boshlangan. Jumladan, vaqtincha saqlash hibsxonalaridagi kameralarni ko‘zga ziyon yetkazmaydigan holda o‘qish yoki yozish uchun yetarli tabiiy va sunʼiy yorug‘lik bilan taʼminlash, isitish hamda boshqa tegishli choralar ko‘rilmoqda.

Bundan tashqari, Qarshi tuman ichki ishlar bo‘limi vaqtincha saqlash hibsxonasi faoliyati to‘xtatilib, saqlanayotgan shaxslar kapital taʼmirlangan Kasbi tuman ichki ishlar bo‘limi vaqtincha saqlash hibsxonasiga ko‘chirildi.

Ombudsman tomonidan bildirilgan kamchiliklarni o‘z vaqtida bartaraf etmagan xodimlarga nisbatan xizmat tekshiruvlari o‘tkazilib, 1 nafar xodim lavozimidan ozod etildi va 9 nafar xodimning xatti-harakatlari “Intizomiy kengashlar” tomonidan ko‘rib chiqildi.

Ayni paytda vazirlik tomonidan vaqtincha saqlash hibsxonalari sharoitlarini yaxshilash bo‘yicha amaliy ishlar davom ettirilmoqda. Kameralar va yuvinish xonalarini kerakli jihozlar bilan taʼminlash va sanitariya talablariga muvofiqlashtirish ishlari davom etmoqda.