BMT O‘zbekistonga milliy miqyosda belgilangan hissalarni tayyorlashda yordam beradi

Ozarbayjon poytaxti Boku shahridagi O‘zbekiston Milliy pavilyonida BMTning iqlim o‘zgarishi bo‘yicha konferensiyasi (COP29) doirasida Iqtisodiy hamkorlik tashkiloti (IHT)ning ekologik muammolar bo‘yicha ishchi guruhi yig‘ilishi bo‘lib o‘tdi.

Yig‘ilishda ishtirokchilar IHT davlatlarining atrof-muhit holati to‘g‘risidagi maʼruzalarini taqdim etdilar va ekologik barqarorlikni taʼminlashda mintaqaviy hamkorlikni mustahkamlash bo‘yicha keyingi qadamlarni muhokama qildilar.

“Iqtisodiy Hamkorlik Tashkiloti mintaqasida dunyodagi eng noyob ekotizimlar, shuningdek, suv va biologik xilma-xillikning eng katta zaxiralari joylashgan. Ammo bu atrof-muhitning jiddiy zaifligi bo‘lgan mintaqadir. Qurg‘oqchilik va suv toshqini kabi ekstremal ob-havo hodisalari atrof-muhitni muhofaza qilish va barqaror kelajakni taʼminlash uchun birgalikda harakat qilishimiz kerakligini eslatadi.

O‘zbekiston doimo ekologiya masalalarida hamkorlik tarafdori bo‘lib kelgan. Iqtisodiy hamkorlik tashkiloti muloqot va hamkorlik platformasi sifatida o‘zining qadr-qimmatini allaqachon isbotlab bo‘lgan, biroq u bugungi kunning oshib borayotgan ekologik muammolarini hal etish uchun ham rivojlanishi kerak”, — dedi O‘zbekiston Ekologiya, atrof-muhitni muhofaza qilish va iqlim o‘zgarishi vaziri o‘rinbosari Obidjon Qudratov.

Muhokamalar chog‘ida qayta tiklanadigan energiya manbalarini rivojlantirish, cho‘llanishga qarshi kurashish, suv resurslaridan oqilona foydalanish va biologik xilma-xillikni saqlash kabi qo‘shma ekologik loyihalarni amalga oshirishga qaratilgan aniq tashabbuslar ilgari surildi.

Ilg‘or tajriba va texnologiyalar almashish, shuningdek, iqlim o‘zgarishi sohasidagi ilmiy tadqiqotlarni kuchaytirish zarurligiga alohida eʼtibor qaratildi. Aʼzo mamlakatlar vakillari ekologik muammolarga yana-da samarali qarshi turish uchun IHT mexanizmlari orqali saʼy-harakatlarni muvofiqlashtirishni kuchaytirish muhimligini taʼkidladilar.