Germaniyada og'ir kasallikka chalingan o'zbek bolalariga tibbiy yordam ko'rsatishga mo'ljallangan xalqaro xayriya jamg'armasi tashkil etildi

Germaniyada "Zokir Abdusattor bolalari" nomli xalqaro xayriya jamg'armasi o'z faoliyatini boshladi.

Mazkur xayriya tashkiloti mamlakatimizdagi kam ta'minlangan va ijtimoiy himoyaga muhtoj bolalarga tibbiy yordam ko'rsatish, ularning sog'lig'ini tiklash va reabilitatsiyasini tashkil etish maqsadida tuzilgan.

Ushbu loyiha turizmga ixtisoslashgan "Uzbekistan-online" va "Uzbekistan-Gallerie" onlayn nashrlar rahbari, bavariyalik Gerxard Birkl va Germaniyadagi bir guruh vatandoshlar tashabbusi bilan "TEZPARCEL" logistik kompaniyasi ko'magida tashkil etildi. Jamg'arma Frankfurt-Mayn shahrida yashagan va xayriya ishlari bilan tanilgan Zokir Abdusattor xotirasiga ochildi.

U o'zbek bolalari uchun qator saxovatli loyihalarni amalga oshirgan, mazkur xayriya jamg'armasi esa uning ezgu ishlarini davom ettirishga xizmat qilishi kutilmoqda.

Jamg'armaning asosiy vazifalaridan biri yurtimizdagi jismoniy va ruhiy rivojlanishida nuqsonlari bo'lgan, onkologik va nevrologik kasalliklarga chalingan bolalarga zamonaviy tibbiy yordam ko'rsatishdan iborat. Xususan, ADHS, ADS, autizm, ZPR va onkologik kasalliklarga duchor bo'lgan bolalarni davolashda Germaniyadagi yetakchi mutaxassislarni jalb qilish rejalashtirilgan.

Jamg'arma o'z oldiga bolalarni bepul tekshiruvdan o'tkazish, tashxis qo'yish va davolash, mahalliy tibbiyot muassasalarini zamonaviy tibbiy uskunalar hamda diagnostik apparatlar bilan ta'minlash, og'ir kasallikka chalingan bolalar uchun Germaniyaning nufuzli klinikalarida davolanish imkoniyatlarini yaratish kabi maqsadlarni qo'ygan.

Tashkilot ijtimoiy himoyaga muhtoj bolalar uchun umid va imkoniyat eshigini ochadi. Uning samarali faoliyati orqali kelajakda yana-da ko'p bolalar sifatli tibbiy xizmat olish imkoniyatiga ega bo'ladi.