Guliston—Toshkent—Chinorkent yo‘nalishida poyezd qatnovi yo‘lga qo‘yildi

Sirdaryo viloyatining Guliston shahridan Toshkent viloyatining Bo‘stonliq tumanidagi Chinorkent bekatigacha 28-martdan poyezd qatnovi yo‘lga qo‘yildi. Bu haqda Sirdaryo viloyati hokimligi xabar berdi.

Qayd etilishicha, ushbu elektropoyezd Gulistondan Chinorkentgacha bo‘lgan masofani 3,5 soatda bosib o‘tadi.

Yo‘l haqi:

• Gulistondan Toshkentgacha — 20 ming so‘m,
• Chinorkentgacha kattalar uchun — 40 ming so‘m, bolalar uchun — 23 ming so‘m.

To‘lovni ATTO transport kartasi yordamida to‘lash yoki chiptalarni temiryo‘l chiptaxonalaridan ham xarid qilish mumkin.

Barcha shart-sharoit, isitish va sovitish tizimiga ega bo‘lgan elektropoyezd vagonlari keng, shinam va xavfsizligi bilan ajralib turadi. 6 ta vagondan iborat bo‘lgan mazkur elektropoyezdning umumiy sig‘imi 586 yo‘lovchiga mo‘ljallangan, deydi “O‘zbekiston temir yo‘llari” AJ shahar atrofida yo‘lovchi tashish MCHJ marketing va servis xizmat ko‘rsatish bo‘yicha direktori o‘rinbosari Dilmurod Ubaydullayev.

Elektropoyezd harakatlanish jadvaliga asosan har kuni qatnaydi. Gulistondan tonggi soat 6:11 da yo‘lga chiqsa, Chinorkentdan Gulistonga qarab 15:43 da jo‘nab, 19:00 da Gulistonga yetib keladi.

“O‘ztemiryo‘lyo‘lovchi” AJ matbuot xizmati qatnov jadvali haqida barafsil ma’lumot berdi. Unga ko‘ra, 7211-sonli Guliston—Toshkent shaharlararo tezyurar poyezdi qatnovi haftaning har kuni yo‘lga qo‘yiladi 7212- sonli Toshkent—Guliston, 7207/7208,7209/7210-sonli Toshkent—Chinorkent Toshkent shaharlararo tezyurar poyezdi qatnovi haftaning seshanba kunidan tashqari har kuni yo‘lga qo'yiladi va quyidagi jadval asosida harakatlanadi:

• 7211-sonli Guliston—Toshkent yo‘nalishi: Guliston 06:11 — Toshkent 07:58;
• 7207-sonli Toshkent—Chinorkent yo‘nalishi: Toshkent 08:15 — Chinorkent 10:15;
• 7208-sonli Chinorkent—Toshkent yo‘nalishi: Chinorkent 10:55 — Toshkent 12:28;
• 7209-sonli Toshkent—Chinorkentyo‘nalishi: Toshkent 13:20 — Chinorkent 14:53;
• 7210-sonli Chinorkent—Toshkent yo‘nalishi: Chinorkent 15:43 — Toshkent 17:16;
• 7212-sonli Toshkent—Guliston yo‘nalishi: Toshkent 17:31 — Guliston 19:00.