O'zbekiston Malayziya bilan sun’iy intellekt va katta hajmli ma’lumotlar boshqaruvi sohasida mutaxassislar tayyorlash bo'yicha hamkorlik o'rnatadi

 O'zbekistonning Malayziyadagi elchixonasi rahbariyati Kuala-Lumpur shahridagi Osiyo-Tinch okeani texnologiya va innovatsiya universitetiga tashrif buyurdi, deb xabar qilmoqda "Dunyo" AA.

Tashrif doirasida mazkur universitet hammuassisi va bosh direktori Parmjit Singx bilan uchrashuv o'tkazildi. Unda mazkur ta’lim dargohi bilan oliy ta’lim, fan va innovatsiyalar sohasida O'zbekiston davlat universitetlari bilan hamkorlikni yanada kengaytirish masalalari muhokama qilindi.

Xorij tomonga O'zbekistonda ta’lim sohasida olib borilayotgan keng ko'lamli islohotlar haqida batafsil ma’lumot berildi.

Parmjit Singx O'zbekiston oliy ta’lim muassasalari bilan axborot kommunikatsiyalari, raqamli texnologiyalar, kiberxavfsizlik yo'nalishlarida ta’lim dasturlarini tashkil etish, qo'shma fakultet ochish, professor-o'qituvchilar va talabalar almashinuv dasturlarini amalga oshirish bo'yicha hamkorlikni kengaytirish uchun imkoniyatlar mavjudligini alohida ta’kidladi. Bu borada O'zbekistonning yetakchi universitetlari bilan o'zaro hamkorlikka oid takliflarni ko'rib chiqishga tayyorligini bildirdi.

Uchrashuv yakunida xorij tomoni bilan sun’iy intellekt, axborot texnologiyalari, katta hajmli ma’lumotlar (Big Data) boshqaruvi mutaxassisliklari bo'yicha o'qituvchilar malakasini oshirish va talabalar almashinuvini yo'lga qo'yish bo'yicha dastlabki kelishuvga erishildi.

O'zbekiston elchisi Karomiddin Gadoyev, shuningdek, universitetning kiberxavfsizlik, moliyaviy monitoring va menejment, ma’lumotlarni boshqarish kabi qator sohalarda real vaqt rejimida talabalar ishtirokida faoliyat olib borayotgan raqamli texnologiyalarning eng zamonaviy uskunalari bilan jihozlangan laboratoriyalari faoliyati bilan tanishdi.