Samarqand shahridagi Prezident maktabining 311,8 mln so‘mlik davlat xaridi bekor qilindi

Korrupsiyaga qarshi kurashish agentligi tomonidan davlat buyurtmachilari amalga oshirayotgan xaridlarda qonunchilik talablariga rioya qilinishi holatlarini monitoring qilish ishlari davomida ayrim davlat buyurtmachilari tomonidan bir qator qonunbuzilish holatlariga yo‘l qo‘yilgani aniqlandi. Bu haqda agentlik matbuot xizmati xabar berdi.

Jumladan:

• Zafarobod tuman bolalar va o‘smirlar sport maktabi buyurtmachiligida 2023-yil 2-avgust kuni o‘tkazilgan 286 million so‘mlik sport inventarlari xarid qilish;
• Qoraqalpog‘iston Respublikasi Jo‘qorg‘i kengesi tomonidan 2023-yil 4-avgust kuni o‘tkazilgan 912,4 million so‘mlik yozgi majlislar uchun charm tomli shiypon qurish;
• Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalar agentligi tizimidagi Samarqand shahridagi Prezident maktabi buyurtmachiligida 2023-yil 5-avgust kuni o‘tkazilgan 311,8 million so‘mlik maktab formalari xarid qilish;
• Qiziltepa tuman yo‘llardan foydalanish unitar korxonasi tomonidan 2023-yil 10-avgust kuni o‘tkazilgan 300 million so‘mlik transportda yuk tashish xizmati ko‘rsatish yuzasidan o‘tkazilgan davlat xaridlarida qonunchilikka zid holatlar aniqlangan.

Jumladan, ushbu davlat xaridlarida “Davlat xaridlari to‘g‘risida”gi qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 20-moddasi (xarid komissiyasining huquq va majburiyatlari), 46-moddasi (davlat xaridlari jarayonidagi cheklovlar) hamda Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi qarori bilan tasdiqlangan nizomning bir qator talablariga amal qilinmagan.  

Xususan, ushbu xaridlarda ishtirok etgan talabgorlarning hujjatlari xarid komissiyasi aʼzolari foydalangan qurilmalar (IP-manzillari bir xil) orqali elektron platformaga yuklangan hamda ayrim ishtirokchilarning takliflari xarid qilish hujjatlarida ko‘rsatilgan baholash mezonlariga zid ravishda baholangan. 

“Mazkur holatlar bo‘yicha agentlik tomonidan xarid komissiyalarining bayonnomalarini bekor qilish to‘g‘risida buyurtmachilarga taqdimnomalar kiritilib, qonunbuzilish holatlari bartaraf etildi”, — deyiladi xabarda.

Shuningdek, ushbu holatlar yuzasidan to‘plangan hujjatlar qonuniy qaror qabul qilish uchun Bosh prokuratura huzuridagi Iqtisodiy jinoyatlarga qarshi kurashish departamentiga yuborilgan.