“Los-Anjeles-2028” yozgi Olimpiya o‘yinlari rejalari muhokama qilindi

O‘zbekiston Milliy olimpiya qo‘mitasida sport federatsiyalari va assotsiatsiyalari masʼullari bilan yaqin davr uchun rejalar hamda ularni amalga oshirish mexanizmiga bag‘ishlangan yig‘ilish o‘tkazildi.

Tadbirda sport vaziri Adham Ikromov, Osiyo olimpiya kengashi vitse-prezidenti, MOQ raisining birinchi o‘rinbosari Otabek Umarov, Qo‘mita bosh kotibi Oybek Qosimov, MOQ raisi o‘rinbosari Sherzod Toshmatov, shuningdek, Sport vazirligi, MOQ va sport federatsiyalar hamda assotsiatsiyalar rahbarlari va masʼullari ishtirok etdi.  

Yig‘ilish avvalida Adham Ikromov ixtisoslashtirilgan sport maktablarining faoliyatini tubdan isloh qilish, viloyatlarda Olimpiya tayyorgarlik bazalarini tashkil etish bo‘yicha o‘z fikrlarini bildirdi. Qolaversa, federatsiyalar masʼullariga kuchli xorijlik murabbiylarni jalb qilish, ular bilan samarali hamkorlikni yo‘lga qo‘yish, hududlar bilan ishlash bo‘yicha vertikal tizim joriy qilish, joylardagi mavjud infratuzilmani o‘rganish, bo‘yicha topshiriq berdi.  

Shuningdek, Otabek Umarov yangi Olimpiya sikliga munosib hozirlik ko‘rish lozimligini qayd etdi. Osiyo va Olimpiya o‘yinlariga tayyorgarlikni yana-da kuchaytirib, “Los-Anjeles-2028” yozgi Olimpiya o‘yinlarida kuchli o‘nlikdan joy olish belgilanganini taʼkidladi. Buning uchun barcha federatsiyalar va terma jamoalarga hozirdan tayyorgarlikni boshlash, seleksiya, farmakologiya, diyetologiya kabi jihatlarga ham alohida ahamiyat qaratish bo‘yicha tavsiyalar berildi.  

Kun tartibiga asosan muhokama davomida O‘zbekiston taekvondo WT assotsiatsiyasining yaqin ikki va to‘rt yillik uchun mo‘ljallangan rejalari taqdimoti o‘tkazildi.  

Yig‘ilishda terma jamoalarning bazalariga tashrif buyurgan holda mutaxassislar va barcha masʼullar ishtirokida ana shunday rejalar muhokama qilinishi, keyingi bosqichda MOQ rahbariyati va masʼullar respublikadagi barcha hududlarga tashrif buyurgan holda mavjud vaziyat o‘rganilishiga kelishib olindi.  

“Los-Anjeles-2028” yozgi Olimpiya va Paralimpiya o‘yinlariga tayyorgarlik ko‘rish bo‘yicha Prezident qarori loyihasi tayyorlanishi belgilandi.