Amerikaning kosmik zondi Quyoshga rekord darajada yaqinlashishga tayyorlanmoqda

NASA kosmik kemasi Quyoshga inson tomonidan yaratilgan boshqa har qanday obyektga qaraganda yaqinroq borib, yangi rekord o‘rnatishga tayyorlanmoqda.

“Parker” quyosh zondi 2018-yilda Quyoshni yaqin masofadan o‘rganish uchun ishga tushirilgan. U o‘z ekspeditsiyasi davomida allaqachon Quyosh tojini — yoritgichning tashqi atmosferasini uchib o‘tgan bo‘lib, bu faqat to‘liq quyosh tutilishi paytida ko‘rinadigan hodisadir.

Hozirda zond yangi bosqichni bosib o‘tishga, xususan, Quyoshga rekord masofada yaqinlashishga tayyorlanmoqda: 24-dekabr kuni apparat yulduz sirtidan atigi 6 million kilometr masofada uchib o‘tib, qizigan quyosh atmosferasiga sho‘ng‘ishi kutilmoqda.

Biroq zond ushbu ekstremal sinovdan qanday o‘tganini NASA olimlari bir necha kundan keyingina bilishadi, chunki yaqinlashish paytida u Yer bilan aloqa zonasidan tashqarida bo‘ladi.

“Parker” Quyoshga avvalgi kosmik kemadan yetti baravar yaqinroq masofaga borishi kutilmoqda. Shu bilan birga, u eng tez kosmik apparatga aylanadi: yulduzga yaqinlashganda soatiga 690 ming kilometr tezlikka erishadi. Uning issiqlik qalqoni 1371°C haroratgacha chidamli hisoblanadi.

Apparat sentyabrgacha shunday yaqin orbitada qolib, olimlarning Quyosh bilan bog‘liq ikkita jumbog‘ini yechishlariga yordam beradigan ma’lumotlarni to‘playdi: nima uchun uning toji yuzasidan yuz marta issiqroq va quyosh shamoli — yulduzdan chiqadigan kuchli zaryadlangan zarralar oqimini nima ta’minlaydi.