BMT Trampning G‘azodan falastinliklarni ko‘chirish rejasini noqonuniy deb atadi

AQSh prezidenti Donald Trampning G‘azo sektorida yashovchi falastinliklarni ko‘chirish rejasi xalqaro qonunlarga ziddir. Bu fikrni BMT Inson huquqlari kengashi tomonidan tuzilgan Falastin hududi bo‘yicha mustaqil komissiya raisi Navi Pilley 9 fevral, yakshanba kuni chop etilgan Politico nashriga bergan intervyusida bildirdi.

«Tramp xalqaro huquq masalalarini nihoyatda yomon tushunadi. Bosib olingan hududda yashovchi bir guruh odamlarni majburan ko‘chirish xalqaro huquq normalarini buzish hisoblanadi va etnik tozalash bilan barobardir», — deydi u.

Pilleyning fikricha, Trampning G‘azo sektoridan falastinliklarni ko‘chirish va uni AQShga topshirish g‘oyasini amalga oshirishning «qonuniy yo‘li» yo‘q.

Ruandadagi genotsid ishini ko‘rgan sobiq Xalqaro jinoiy sud (XJC) va maxsus sud sudyasi Pilley Trampning Amerika fuqarolari va AQShning Isroil kabi ittifoqchilariga nisbatan tergov harakatlari tufayli XJS rasmiylariga nisbatan sanksiyalarini qoraladi. «Xalqaro huquq ikki tomonlama standartlarsiz, davlatning do‘stlariga nisbatan bir xilda amal qiladi», dedi Pilley.

Trampning G‘azo sektori bo‘yicha rejasi dunyo davlatlarida tanqid qilindi

AQSh prezidenti Donald Trampning G‘azo sektoridan falastinliklarni ko‘chirish va qirg‘oq chizig‘ini Amerika nazorati ostiga olish taklifi ko‘plab mamlakatlarda tanqid qilindi. Xususan, u Germaniya Bundestagidagi hukmron koalitsiya va muxolifat tomonidan tanqid qilindi. 5 fevral kuni Germaniya Sotsial-demokratik partiyasi (GSDP)ning tashqi siyosat bo‘yicha eksperti Nils Shmidning aytishicha, Trampning G‘azo sektori haqidagi g‘oyasini «mutlaqo qabul qilib bo‘lmaydi».

Bunday harakat «xalqaro huquqni qo‘pol ravishda buzish va ikki million falastinlikni o‘z vatanidan mahrum qilishdir», dedi u Reuters agentligiga. Sotsial-demokrat Isroilning xavfsizligi hamda falastinliklarning erkinlik va qadr-qimmatda yashash huquqi faqat ikki davlatning tinch-totuv yashashi asosidagi mojaroni hal qilish orqali kafolatlanishi mumkinligini ta’kidladi. 

«Biz yevropaliklar, arab dunyosidagi hamkorlarimiz bilan birgalikda ushbu tamoyilga amal qilishimiz kerak», — deya qo‘shimcha qildi u hamda Germaniya, Fransiya, Iordaniya va Misr tashqi ishlar vazirlarining uchrashuvini o‘tkazishga chaqirdi.

O‘z navbatida, Xristian-demokratik ittifoq (XDI) va Xristian-sotsial ittifoq (XSI) muxolifatdagi fraksiyasi raisi o‘rinbosari Yoxann Vadeful «Trampning Yaqin Sharq siyosatidagi kutilayotgan buzg‘unchi unsurlar» haqida gapirdi. U AQShning G‘azo sektori kelajagi va uni qayta qurish uchun javobgarlikni o‘z zimmasiga olish majburiyatini olqishladi. Shu bilan birga, mojaroni xalqaro huquq asosida hal etishning haqiqiy siyosiy yechimiga erishish muhim, dedi u.