Fon der Lyayen Zelenskiyni muzokaralarda qo‘llab-quvvatlashiga ishontirdi

Ukraina prezidenti Vladimir Zelenskiy Rimda bo‘lib o‘tgan uchrashuvda Yevropa komissiyasi rahbari Ursula fon der Lyayen bilan bir qator muhim masalalarni, xususan, Kiyev va YeI o‘rtasidagi hamkorlik, Rossiyaga qarshi 17-sanksiya paketini tayyorlash va Ukrainaning Yevropa Ittifoqiga qo‘shilish yo‘lidagi qadamlarini muhokama qildi. Bu haqda ikkala siyosatchi ham 26-aprel, shanba kuni ijtimoiy tarmoqlarda ma’lum qildi.

"Hurmatli Vladimir Zelenskiy, Yevropa tinchlikka erishish yoʻlida doimo Ukraina yonida boʻladi", deb yozadi fon der Lyaen X da. "Adolatli va mustahkam tinchlikka erishish uchun muzokaralar stolida bizning qoʻllab-quvvatlashimizga ishonishingiz mumkin. Bugun biz Ukraina xalqlar oilamizda oʻz oʻrnini egallash uchun qanday qadamlar qoʻyganini ham muhokama qildik".

Zelenskiyning so‘zlariga ko‘ra, suhbatda asosiy e’tibor “ukrainaliklar hayotini himoya qilish, xavfsizlikni tiklash va so‘zsiz o‘t ochishni to‘xtatishni yaqinlashtirishga yordam beradigan qadamlar”, shuningdek, Ukraina va Yevropa Ittifoqi o‘rtasidagi hamkorlikni, xususan, “ReArm Europe” tashabbusi orqali mustahkamlashga qaratilgan. "Yevropa Ittifoqining 17-sanksiya paketini tayyorlashga alohida e'tibor qaratildi. Uning Rossiya iqtisodiyotining asosiy tarmoqlariga yo'naltirilishi va tinchlikni tiklash uchun Rossiyaga bosim elementlaridan biriga aylanishi muhim", - deb yozdi Ukraina rahbari ijtimoiy tarmoqdagi sahifalarida.

Avvalroq Vladimir Zelenskiy Fransiya prezidenti Emmanuel Makron va Buyuk Britaniya bosh vaziri Key Starmer hamda AQSh prezidenti Donald Tramp bilan uchrashdi. Dunyo yetakchilari Rimga Rim papasi Fransiskning dafn marosimiga kelishdi.